Embaixadór Austrália ba Timor-Leste, Peter Roberts. Imajen TATOLI/Evaristo Soares Martins.

DILI, 12 maiu 2021 (TATOLI)—Governu Austrália kontinua apoia Timor-Leste iha prevensaun no kombate hasoru pandemia COVID-19.

Notísia Relevante: Austrália reitera apoiu Timor-Leste iha ámbitu COVID-19 no dezastre naturál

“Ami ko’alia kona-ba kooperasaun Austrália nian ho Timor-Leste, partikularmente coronavirus, no ha’u bele komprende katak Austrália prontu serbisu nafatin ho Timor-Leste, partikularmente iha tempu defísil ne’e luta kontra coronavirus (COVId-19),” Embaixadór Austrália ba Timor-Leste, Peter Roberts, informa ba jornalista sira, hafoin hasoru malu ho Prezidente Parlamentu Nasionál, Deputadu Aniceto Longuinhos Guterres Lopes, iha uma fukun, kuarta ne’e.

Embaixadór Peter informa ba Prezidente Parlamentu Nasionál kona-ba kooperasaun sira inklui peritu sira hosi Austrália iha prosesu vasinasaun.

“Sei kontinua lori vasina hosi Austrália mai Timor-Leste, no mós Austrália kontinua servisu nafatin iha laboratóriu nasionál iha Ministériu Saúde, atu responde ba surtu COVID-19,” nia dehan.

Iha sorumutu ne’e, Embaixadór Austrália ne’e ho Prezidente Parlamentu Nasionál, diskute mós kona-ba futuru kooperasaun entre parlamentu Austrália no parlamentu Timor-Leste.

“Ha’u mós ko’alia ho prezidente kona-ba kooperasaun entre parlamentu Austrália nian no parlamentu Timor-Leste nian, agora defísil atu ba Austrália no mai Timor-Leste tanba coronavirus. Ha’u espera katak iha futuru bele hametin ligasaun entre parlamentu rai-rua ne’e,” Peter dehan.

Notísia Relevante: Austrália ho Santos apoiu elikópteru hodi reforsa ajudu umanitáriu

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here