Matebian, Ajente Xefe Polísia, Domingos da Costa Mendonça ‘Maubutar’. Imajen/PNTL.

DILI, 12 maiu 2021 (TATOLI)—Polísia Nasionál Timor Leste (PNTL), Komandu munisípiu Dili, seksaun Tránzitu, lakon membru ida, Ajente xefe polísia, Domingos da Costa Mendonça ‘Maubutar’ ne’ebé remata ona peregrinasaun iha mundu.

Maubutar sofre moras fuan no hetan atakasaun iha uma, iha 04 maiu 2021, no família-sira konsege transporta ba Ospitál Nasionál Guido Valadares (HNGV sígla portugés), iha tersa (11/05) tuku 18:00 otl, hodi hetan asisténsia médika, maibé la konsege salva.

Notísia relevante:Komandu PNTL presta omenajen ba Saudozu Loriku Matebian

Kaben hosi matebian, Amália Rodrigues Ximenes, esplika antes ne’e matebian sofre duni moras fuan no konsege hala’o tratamentu saúde durante semana ida, no rekopera tiha médiku-sira fó alta hodi fila ba uma.

“Nia baixa semana ida, depois doutór-sira halo tratamentu másimu, no fila ba uma, maibé bainhira hetan fali atakasaun la konsege salva,” Amália Rodrigues Ximenes  hateten ba jornalista-sira iha rezidénsia, Lahane, Dili, kuarta ne’e.

Saudozu moris iha Lahane, iha 31 janeiru 1980, hosi aman Mateus Mendonça, no inan Manuela Mendonça, nu’udár oan mane ba da-haat hosi maun-alin na’in-12, no na’in sia (9) sei moris, na’in-tolu mate ona.

Matebian hosik-hela kaben ho oan na’in-neen (6) feto tolu, mane tolu ne’ebé daudaun-ne’e sei hala’o hela sira-nia estudu pré-sekundária iha Dili.

Amélia husu ba Komandu Jerál PNTL, atu kontinua tau-matan ba matebian nia-oan sira, liu-liu akompaña sira-nia estudu to’o remata universidade.

“Ha’u husu ba komandu PNTL, bele ajuda ha’u haree ha’u-nia oan na’in-neen bele remata sira-nia estudu iha universidade,” Amalia husu ho tanis.

Joven rezisténsia hosi Lahane ne’e, hahú tama iha instituisaun PNTL iha 2003, serbisu iha unidade oin-oin to’o hakotu-iis ho knaar membru Unidade Tránzitu Dili.

Komandu promove diviza ajente xefe ba sarjentu

Iha parte seluk, segundu Komandante PNTL, Superintendente Xefe, Euclides Belo, dehan Komandu munisípiu Dili, lakon membru di’ak ida ne’ebé dixiplina no sempre koopera ho irarkia no membru-sira seluk bainhira hala’o knaar.

Nia dehan, Komandu Jerál PNTL hatún ona despaixu ba Komandu PNTL munisípiu Dili, hodi valoriza saudozu nia kontribuisaun, hodi promove diviza hosi ajente polísia ba sarjentu polísia.

Nu’udár komandante ne’ebé serbisu hamutuk tinan barak, Euclides Belo konsidera saudozu ‘Maubutar’ nu’udár ema laran-di’ak no sempre kumpre ninia knaar serbí estadu, to’o hakotu-iis.

“Hanesan komandante, kolega serbisu, ami sente lakon membru di’ak ida iha komandu munisípiu Dili. Nia ema ida ne’ebé dixiplina di’ak tebtebes, hatene komunika ho ema hotu-hotu,” Euclides Belo konta tuir, iha mate-uma Lahane.

Tuir ajenda, kinta (13/05), Komandu PNTL Díli koopera ho família sei hala’o serimónia funerál ba mate-isin ho parade militár iha semitériu Becusse, Dili.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here