Vítima dezastre naturál hela iha tenda okos iha Sentru Evakuasaun Sede Suku Manleuana, Dili. Imajen Tatoli/Arminda Fonseca

DILI, 11 maiu 2021 (TATOLI)-Koordenadór Sentru Evakuasaun vítima dezastre naturál iha Sede Suku Manleuana, Dili, Jaime Gonçalves, informa vítima dezastre naturál ne’ebé evakua ba Sede Suku Manleuana hamutuk uma-kain 80.

Notísia Relevante : Austrália apoiu tenda 220 ba vítima dezastre naturál iha Timor-Leste

Koordenadór Sentru Evakuasaun vítima dezastre naturál iha Sede Suku Manleuana, Dili, Jaime Gonçalves. Imajen Tatoli/Arminda Fonseca

“Dezde akontese inundasaun iha 04 abríl liubá, vítima-sira uma-kain 80 mak evakua mai iha Sede Suku Manleuana to’o agora vítima sira laiha ida mak fila-ba sira-nia uma tanba uma estraga totál no mota lori lakon hotu,” Jaime Gonçalves informa ba Agência Tatoli iha Sede Suku Manleuana, Dili, tersa ne’e.

Kona-bá fornesimentu hahán ba vítima-sira iha sentru evakuasaun Sede Suku Manleuana, nia dehan, vítima-sira dezde evakua ba sentru evakuasaun Sede Suku Manleuana to’o agora hahán sufisiente, maibé fatin mak la seguru tanba vítima-sira toba de’it iha rai.

“Sira hetan kolxaun no manta, maibé ida-ne’e nafatin fó impaktu ba sira liuliu labarik ki’ik-oan sira tanba agora tempu udan ne’e aumenta tan toba iha rai halo labarik-sira barak mak hetan moras hanesan, isin-manas, mear  no seluk tan,” nia fó sasin.

Nia husu ba Governu atu bele karik ajuda lalais materiál konstrusaun ba vítima-sira nune’e sira bele fila-fali ba sira-nia fatin.

Iha fatin hanesan vítima dezastre naturál, Maria Soares do Rego hateten, durante  ne’e sira hetan ai-han, maibé sira mós presiza tebes ropa tanba akontese inundasaun sira halai ho ropa tahan ne’ebé iha isin de’it ne’ebé agora laiha ropa atu sira uza loroloron troka malu.

“Ami agradese ba Governu tanba apoiu ona hahán mai, maibé ami presiza mós ropa tanba akontese inundasaun ne’e ami halai la lori ropa, ami mai hela iha sentru evakuasaun ne’e viziñu-sira mak ajuda ami fó ropa, tanba ne’e ma ami presiza tebes ropa,” nia hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here