Hakerek na’in, Afonso Soares.

Husi:

Afonso Soares

Konstituisaun Repúblika Demokrátika Timor-Leste iha artigu 57 alinea 1 hatete Estadu hatene katak ema hotu iha direitu ba saúde, asisténsia médika sanitária, no mós devér atu defende no promove direitu ne’e.

Situasaun ida-ne’e, haree katak sidadaun-nia saúde iha sirkunstánsia balu, konstitui devér ba protesaun no sirkunstánsia seluk nu’udar Estadu nia obrigasaun ne’ebé hala’o liuhosi disponibilizasaun apoiu sira saúde nian no opsaun polítika, inklui prosedimentu sira ne’ebé nesesáriu no adekuadu, nune’e sidadaun bele goza direitu ida-ne’e hodi kombate no prevene moras oioin mak ataka no infesiona sira nia saúde.

Organizasaun Mundiál ba Saúde (OMS) iha loron 11 fulan-marsu 2020 deklara ona katak Covid-19 nu’udar pandemia ida, tanba konstitui vírus infesioza ida ne’ebé ameasa ema barak nia saúde ho forma simultánea iha mundu tomak. Ho ezisténsia Covid-19, aleinde determina efeitu sekundáriu oioin hanesan estagnasaun iha dezenvolvimentu setór estratéjiku sira ne’ebé Estadu planeia ona atu alkansa, hamosu liuliu ameasa ida ne’ebé sériu tebes ba sidadaun-nia saúde.

Ameasa ne’e hanesan impaktu diretu husi Covid-19 hodi aumenta responsabilidade estraordinária Estadu nian, nune’e determina ajustamentu iha planu asaun sira, inklui redefinisaun ba prioridade estratéjika sira mak molok ne’e trasa ona. Providénsia sira mak Estadu halo iha ámbitu ida-ne’e, nu’udar ezijénsia ida ba Estadu hodi halo tuir devér ne’ebé defini ona iha lei fundamentál, liuliu iha ámbitu desizaun ba opsaun polítika no prosedimentu sira, atu sidadaun hotu bele goza sira-nia direitu no sujeita ba devér sira iha kontestu protesaun ba sira-nia saúde ho forma ne’ebé laiha diferensa no tuir prinsípiu fundamentál sira ne’ebé konsagra ona iha lejislasaun sira mak vigora iha ita-nia país.

Iha ámbitu Covid-19 ninia dezenvolvimentu ne’ebé determina ameasa ba saúde públika, rekoñese katak Estadu halo ona esforsu ba prevensaun no mitigasaun impaktu husi vírus refere, nu’udar jestu ba kumprimentu Estadu nia devér konstitusionál. Entretantu, atividade monitorizasaun no ajustamentu iha meiu sira presiza hala’o nafatin, inklui iha intervensaun normativa haree husi númeru kazu no evolusaun ba aspetu oioin iha ita-nia sosiedade, hanesan komportamentu husi sidadaun iha kontestu luta ba prevensaun no mitigasaun ba impaktu husi pandemia refere nsst.

Planu vasinasaun kontra Covid-19 ne’ebe aprova ona husi Governu liuhusi rezolusaun n.o 10 /2021, loron 24 fulan-fevereiru no medida esensiál sira seluk nu’udar esforsu sira mak Estadu realiza ona iha ámbitu resposta ba pandemia eh inimigu invizível ida-ne’e. Iha sentidu ne’e, bainhira ita observa ho rigór entre kláuzula konstitusionál iha leten no rezolusaun refere, eziste inkonsisténsia okulta (lahatudu) ida, liuliu iha direitu no devér ne’ebé mak respetivamente pertense ba sidadaun no ba Estadu. Lei fundamentál, iha parte ida, konsagra nu’udar devér Estadu nian atu proteje sidadaun-nia saúde, enkuantu rezolusaun, iha parte seluk, estabelese prinsípiu fakultativu iha asesibilidade ba vasina, aliás, laiha obrigatoriedade ba sidadaun atu hetan vasina, maski rekomenda no enkoraja fortemente injesaun hodi protesaun saúde. Prinsípiu ne’e rasik bele iha kontraditoriedade ho objetivu sira mak define ona, iha ámbitu luta hasoru Covid-19.

Covid-19 mosu hanesan pandemia mundiál ida ne’ebé ninia grau kona-ba risku aas liu kompara ho sira seluk, hanesan vírus Ébola, Surtu Sazonál Cólera, Malária, inklui pandemia sira iha tempu pasadu. Maski nune’e, ninia prevensaun hala’o ho meiu impozisaun jurídika (mekanizmu ida mak loloos, akontese ho forma espontánea no voluntariamente), enkuantu vírus sira seluk, Estadu naturalmente kumpre nia devér no sidadaun ho voluntariamente, prátika medida sira iha ámbitu prevensaun no kombate vírus sira refere, inklui hetan asisténsia diagnóstika no vasinasaun.

Kestaun persistente ida iha sidadaun mak vasina AstraZeneca nu’udar direitu, devér eh onus iha kontestu Timor-Leste? Estadu nia devér no sidadaun nia direitu, loloos akontese ho forma sinalagmátika iha ámbitu luta kontra Covid-19.

Estadu, iha ámbitu kalamidade sira, hanesan Covid-19, posui podér supremu hodi aprova medida sira ho vínkulu obrigatóriu, nune’e bele ultrapasa impaktu negativu husi kalamidade ida no lapermite sidadaun atu hamosu asaun oioin, hanesan defeza, rezisténsia no opozisaun kontra desizaun sira Estadu nian. Ho nune’e, iha nesesidade atu hola opsaun polítika no providénsia téknika sira mak rasionál, koerente no insensível, atu lahamosu fali paradigma foun iha mentalidade sidadaun-nian, hodi hamosu asaun kontraditória oioin mak la kontribui ba misaun espesiál ne’ebé Estadu hala’o hela hasoru ameasa públika hosi kalamidade sira.

Ita bele anota husi persisténsia kalamidade atuál nian, asaun no reasaun oioin ho natureza kontraditória hasoru desizaun administrativa no narmativa kontinua eziste (persiste), maski Estadu Emerénsia ne’ebé deklara hahú kedan liuhusi dekretu Prezidente Repúblika númeru 29 /2020, loron 27 fulan-marsu, inklui renovasaun foun tuir dekretu Prezidente Repúblika númeru 24/2021, loron 28 fulan-abril, iha alínea g) artigu 4 impede kualkér aktu rezisténsia, tantu ativa eh pasiva husi sidadaun ba orden husi autoridade públika kompetente sira. Asaun sira ho naruteza nune’e, dala barak mosu ho razaun oioin, ne’ebé bele sai objetu ba análize no ajustamentu ruma mak nesesáriu iha resposta sira ba pandemia refere (tantu administrativa, nune’e mós normativa), ho konsiderasaun aas ba kustu no benefísiu sira.

Entre mekanizmu legál sira mak Governu aprova iha ámbitu prevensaun no mitigasaun ba impaktu husi Covid-19, vasinasaun ne’ebé, pur enkuantu konstitui rekursu ikus iha meiu prevensaun nian, asumi natureza fakultativa, enkuantu diagnóstika (teste swab), konstitui natureza obrigatória, prosedimentu ida mak foin aprova hosi Konsellu Ministru, iha inísiu fulan-maiu 2021, liuhusi dekretu Governu n.o 15/2021, loron 5 fulan-maiu, alterasaun dahuluk ba dekretu Governu n.o 14/2021, loron 29 fulan-abril (Medida sira ba ezekusaun deklarasaun Estadu emerjénsia). Prosedimentu sira refere haree husi deklarasaun komite konsultativa globál OMS nian kona-ba seguransa husi vasina AstraZeneca kontra Covid-19, ne’ebé konfirma katak vasinasaun sai nu’udar ferramenta esensiál ida mak ajuda iha kontestu prevensaun kazu sira, mate no kontrolu ba pandemia ne’e rasik, nomós OMS no Agência Europeia de Medicamentos, ne’ebé afirma vasina AstraZeneca/Oxford kontra Covid-19 lori benefísiu barak liu duké risku ba saúde; tuir ha’u, ne’e bele sai referénsia ba definisaun estratejia sira mak Estadu hola, iha ámbitu prevensaun no mitigasaun ba impaktu husi Covid-19, ho patamar (nível) ne’ebé hanesan.

Ein jerál, vasina kontra Covid-19 la’ós obrigatóriu. Karaterístika fakultativa husi vasina ne’e rasik la’ós de’it iha Timor-Leste, situasaun hanesan adota mós iha Portugal no iha país sira seluk. Iha Brazil, konforme Jornal do Comércio, públika iha loron 17 fulan-dezembru 2020, tuir entendimentu Supremu Tribunál Federál (STF) nian, iha julgamentu ba prosesu sira kontra sidadaun balu mak rekuza atu hetan vasinasaun, laiha lei ruma mak impoin atu lori obrigatoriamente sidadaun ba vasina, maibé norma eventuál ruma bele limita sidadaun-nia direitu, kuandu komprova lahetan vasina. Ita iha mundu ida ho ritmu evolusaun lais tebes, ezijénsia moris hosi tempu ba tempu muda, futuru nu’udar espasu inserteza ida, lahatene asaun definida saida hodi hasoru futuru ida-ne’e, maibé resposta provizósira sira, ita presiza prepara nu’udar senáriu ba paradigma moris, iha futuru ida ho natureza ida-ne’e.

 BBC news Brazil, fó-sai notísia ida husi OMS, intituladu “vacina obrigatória contra covid-19 pode ser necessária em países com baixa adesão voluntária e alto contágio”, ita bele rekoñese, maski medida ida-ne’e la’ós aktu vinkulativu ida, nune’e mós entendimentu husi STF nian, maibé faktualmente nesesáriu, ne’ebé bele sai referénsia ba senáriu foun iha Timor-Leste, bainhira kazu konfirmadu no númeru óbitu rezulta husi Covid-19 sa’e maka’as.

Ho senáriu ne’e, determina nesesidade hodi ajusta rezolusaun ne’ebé aprova planu vasinasaun, nune’e vasina iha ita nia kontestu bele sai devér ida ba sidadaun no ida-ne’e, ho forma automátika, natureza hosi vasinasaun bele sai kompulsória ho objetivu ba protesaun saúde públika. Iha etapa inisiál ne’ebé lansa ona, sidadaun balu mak sai alvu dahuluk, deziste ho ponderasaun pesoál nomós natureza fakultativa husi vasina refere rasik, enkuantu sidadaun balu konsidera nu’udar direitu no oportunidade ida, nune’e voluntariamente hakat ba sentru saúde sira hodi hetan vasina.

Kestaun ne’ebé ita preokupa mak, bainhira sidadaun lahatudu asaun voluntária hodi hetan vasina ho kuantidade aas, iha tempu hanesan ne’ebé númeru kazu aumenta, ita sei hasoru senáriu ida aat liu no bele falla hodi atende. Ita espera katak ho lansamentu etapa dahuluk ba vasina AstraZeneca 20% ne’ebé liubá, bele sai ona referénsia di’ak ida atu konvense sidadaun hodi voluntariamente aseita ho vasinasaun iha etapa sira tuir mai. Meiu seluk hodi konvense voluntariedade husi sidadaun mak hakle’an no haluan kampaña informasaun kona-ba vasina AstraZeneca liuhusi meiu prezensiál iha lokál sira mak sei livre husi Covid-19 no meiu komunikasuan virtuál sira iha lokál ne’ebé iha ona kazu konfirmadu. Ho nune’e, bele evita Timor-Leste husi senáriu iha leten.

Hakerek na’in lisensiadu iha Direito husi UNTL/FUP no konklui mós pós-graduasaun ida husi Fakuldade Direito Universidade Nova Lisboa no nu’udar asesór jurídiku iha KFP.

Referénsia sira husi artigu ida-ne’e:

  • Konstituisaun RDTL;
  • Rezolusaun Governu n.o 10 /2021, loron 24 fulan-Fevereiru;
  • Dekretu Prezidente Repúblika N.° 29 /2020, loron 27 fulan-Marsu, inklui renovasaun foun tuir Dekretu Prezidente Repúblika n.o 24/2021, loron 28 fulan-Abril;
  • Dekretu Governu n.o 15/2021, loron 5 fulan-Maiu, alterasaun dahuluk ba Dekretu Governu n.o 14/2021, loron 29 fulan-Abril (Medida sira ba Ezekusaun Deklarasaun Estadu Emerjénsia);
  • Asesu mós, iha loron 7&8-05-2021, sítiu internet sira tuir mai:
  1. https://www.paho.org/pt/noticias/19-3-2021-declaracao-do-comite-consultivo-global-da-oms-sobre-seguranca-vacinas-gacvs;
  2. https://news.un.org/pt/story/2021/04/1746962;
  1. https://www.acidadeon.com/araraquara/cotidiano/coronavirus/NOT,0,0,1577013,e-obrigatorio-ou-nao-tomar-vacina-contra-covid-19-entenda.aspx.

HAKEREK NO HATÁN

Please enter your comment!
Please enter your name here