Sekretáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Egas Cristóvão

DILI, 11 maiu 2021 (TATOLI)–Sekretaria Estadu Komunikasaun Sosiál (SEKOMS) komprometidu kontinua fasilita divulga informasaun loloos ba komunidade ligadau ho prevensaun surtu COVID-19.

Sekretáriu Estadu Komunikasaun Sosiál, Merício Juvinal dos Reis ‘Akara’, hateten SEKOMS nafatin serbisu hamutuk ho mídia Estadu no privadu hodi divulga informasaun loloos no kredível ba públiku.

“SEKOMS prontu atu fasilita informasaun ba ita-nia sidadaun sira, liuliu mídia Estadu sira hanesan Agência TATOLI,IP, Rádiu no Televizaun Timor-Leste (RTTL, E.P), inklui rádiu komunidade, ho kolaborasaun mídia privadu sira ne’ebé sempre prontu atu fasilita divulga informasaun hosi Sala Situasaun-Sentru Integradu Jestaun Krize (SS-CICG, sigla portugés) ba públiku,” Sekretáriu Estadu Akara relata hafoin ramata reuniaun ho Primeiru-Ministru, Taur Matan Ruak, iha Rezidénsia Farol, tersa ne’e.

Aleinde ne’e, fasilita informasaun ba Ministériu Saúde (MS) atu kontinua alerta informasaun ba públiku, ne’ebé kada loron nafatin fó sai nota imprensa hodi mídia sira kanaliza ba plataforma ida-idak.

“Ami kolabora iha parte komunikasaun direta, ne’ebé SEKOMS oferese karreta ida ho ekipamentu hanesan toa hamutuk ho karreta Cruz Vermelha de Timor-Leste (CVTL) hodi tama sai bairru, ho objetivu informa no halo interasaun bebeik ba sidadaun nune’e sira labele monu ba desinformasaun ka hoax sira, atu kontinua divulga informasaun loloos hosi fonte kredível atu hamate informasaun hoax sira,” governante ne’e subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here