Plenária Parlamentu Nasionál. Imajen Tatoli/António Gonçalves.

DILI, 11 maiu 2021 (TATOLI)—Parlamentu Nasionál liuhosi Komisaun D ne’ebé trata asuntu Ekonomia no Dezenvolvimentu, rekomenda ba Sekretária Estadu Formasaun Profisionál no Empregu (SEFOPE) atu halo revizaun ba artigu balun iha lei traballu ne’ebé la kondiz ho situasaun atuál.

“Rekomenda ba SEFOPE atu identifika lei traballu iha parte ne’ebé mak la kondiz ona ho situasaun atuál ne’ebé iha kondisaun bele aprezenta ba Parlamentu Nasionál hodi halo alterasaun,” refere relatóriu fiskalizasaun Komisaun D nian ne’ebé aprezenta ba plenária, segunda ne’e.

Iha relatóriu hosi fiskalizasaun polítika ne’e liga ba lejizlasaun ne’ebé presiza halo mak halo revizaun ba lei traballu (Lei númeru 04/2012, 21 fevereiru) ne’ebé iha parte balun la kondiz ona ho situasaun atuál.

“Ida-ne’e nu’udar rekizitu ida hodi halo ratifikasaun ba konvensaun ne’ebé liga ba violénsia hasoru feto no labarik iha serbisu fatin no lejizlasaun seluk parte jurídiku prepara ona sei lori ba aprezenta hodi bele hetan aprovasaun hodi nune’e bele fortifika liután serbisu ne’ebé SEFOPE iha,” relatóriu fiskalizasaun hosi Komisaun D ne’ebé lidera hosi Deputadu Antoninho Bianco ne’e haktuir.

Entretantu, Deputada Bankada Partidu Libertasaun Populár (PLP), Maria Angelina Lopes Sarmento, simu informasaun hosi traballadór empreza privadu sira ho saláriu mínimu $120 durante tinan 15 ona maibé saláriu nunka hetan mudansa. Enkuantu loja Xinés sira-ne’ebé foin loke ne’e saláriu mínimu $150.

Maibé, nia dehan, informasaun seluk ne’ebé nia halibur hosi traballadór Leader no Lita Store katak traballadór balun ba tuir teste swab mak ninia rezultadu deteta pozitivu mak empreza-na’in ko’a traballadór sira-nia saláriu.

“Deteta mak pozitivu entaun ko’a tán sira-nia salariu. Tanba ne’e mak ami husu se bele SEFOPE ho Komisaun D iha oportunidade ba halo inspesaun ba loja sira hodi ko’alia direta ho traballadór sira. Ha’u simu informasaun ne’e hosi traballadór sira balun ne’ebé servisu iha loja Leader no Lita Store,” nia dehan.

Tuir observasaun Agência TATOLI durante ne’e baze ho Lei númeru 04/2012, 21 fevereiru kona-ba lei traballu, empreza privadu inklui setór públiku tantu traballadór no empregradór seidauk kumpre didi’ak artigu sira hanesan artigu 19 (devér mútuo sira), artigu 20 (devér sira hosi empregadór), artigu 21 (devér sira hosi traballadór), artigu 25 (períodu normal sservisu), artigu 27 (oras estraordinária sira), artigu 28 (servisu kalan), artigu 32 (ferias), artigu 34 (prinsípiu jerál sira).

Nune’e mós artigu 35 (obrigasaun jerál hosi empregadór), artigu 36 (obrigasaun jerál hosi traballadór), artigu 39 (modalidade sira ba remunerasaun), artigu 44 (subsídiu anuál), artigu 55 (reintegrasaun no indemnizasaun), artigu 59 no 60 (lisensa maternidade no lisensa paternidade).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here