Edifísiu Ministériu Solidariedade Sosi’al no Inkluzaun (MSSI), Caicoli, Dili. Imajen/Espesiál.

DILI, 11 maiu 2021 (TATOLI)—Ministériu Solidaridade Sosiál no Inkluzaun (MSSI), ezekuta ona Orsamentu Jerál Estadu (OJE) 2021, hamutuk millaun $1,2 ($1,178,670,23) hosi montante millaun $19,9.

Alokasaun OJE 2021 nian ba MSSI ho montante miliaun $19,9 atu realiza ninia programa iha semestre dahuluk nian maibé ho pandemia COVID-19, MSSI foin mak ezekuta de’it saláriu vensimentu ho bens servisu ne’ebé mak ho nia ezekusaun foin mak 7.8%.

Diretór Jerál Finansa MSSI, Zeferino Martins, hateten hosi ezekusaun 7.8% ho milliaun $1,2 ne’e maihosi saláriu vensimentu 29.7% ho gastu hamutuk $527,142,63, bens servisu 13.0% ho gastu hamutuk $406,146,46, kapitál menór zero maibé prosesu sei la’o hela no kapitál dezenvolvimentu mós zero hela.

“Ita haree ezekusaun OJE 2021 nian ho pursentu ne’ebé kiik liu tanba ho razaun serka sanitaria. Ita labele implementa programa hotu ne’ebé ita planu ona,” Diretór Jerál Finansa MSSI ne’e hateten ba Agência TATOLI, iha nia knaar fatin MSSI Caicoli, Dili, segunda ne’e.

Diretór ne’e hateten maske situasuan COVID-19 maibé sira esforsu nafatin para iha semestre daruak ne’e MSSI bele ezekuta ho pursentu boot, no garante katak tinan ne’e MSSI bele implementa hotu programa no planu ne’ebé MSSI trasa ba tinan ne’e.

“Ha’u otimista katak tinan ne’e ami-nia ezekusaun tenke sa’e maske COVID-19. Maibé ami nafatin esforsu tanba iha 2019 ami ezekuta orasamentu to’o 98%, depois 2020 tún uituan ba 95%. Tanba ne’e ho esperiénsia tinan rua kotuk, ami garante katak ezekusaun sei aumenta tan. Ne’e, ha’u otimista katak tenke atinje liu pursentu ne’ebé iha,” nia garante.

Kona-ba kapitál dezenvovimentu, nia dehan, Ministériu Solidariedade Sosiál no Inkluzaun (MSSI) iha programa sira mak atu halo konstrusaun edifísiu ba MSSI Munisípiu Aileu, Ainaro, Liquiça no Munisípiu Viqueque.

“Maibé, ita edifísiu rua ne’ebé iha problema kona-ba ba rai mak Munisípiu Liquiça ho Viqueque. Maibé ami kontinua esforsu hodi realiza iha tinan ne’e. Orsamentu ba projetu haat ne’e hamutuk $2.016.000,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here