Sekretáriu Estadu Komunikasaun Sosiál, Mericio Juvenal dos Reis “Akara” hala’o lansamentu Rádiu Streaming ba Rádiu Komunidade 14 iha Munisípiu Liquiça, sesta (29/05/2020). Imajen Tatoli/Eugénio Pereira

DILI, 11 maiu 2021 (TATOLI) – Administradór munisípiu tolu, kompostu hosi Munisípiu Lautem, Manufahi ho Aileu, oferese ona rai ba Sekretáriu Estadu Komunikasaun Sosiál (SEKOMS) atu dezenvolve no estabelese infraestrutura mídia munisípiu.

Notísia Relevante : SEKOMS atualiza progresu serbisu ba PM

“Ami iha ona planu  atu tun ba baze hodi ko’alia ho administradór-sira atu harii mídia iha kada munisípiu-sira, maibé ami sei hein kuandu COVID -19 ne’e remata. Ami simu ona informasaun hosi administradór na’in tolu ne’e katak sira prontu ona oferese fatin ka rai ba ami atu dezenvolve mídia iha sira-nia munisípiu,” Sekretáriu Estadu Komunikasaun Sosiál, Merício Juvenal dos Reis “Akara”, hateten ba jornalista-sira hafoin hasoru malu ho Primeiru-Ministru Taur Mata Ruak iha rezidénsia Estadu, Faról, Dili, tersa ne’e.

Merício Akara esplika katak planu harii mídia munisípiu ne’e ho intensaun atu fasilita jornalista sira hanesan reprezentante Radio Televizaun Timor-Leste (RTTL), Agência Tatoli, GMN, Timor Post, Independente, STL no meiu komunikasaun  sira seluk bainhira ba munisípiu sira bele utiliza fasilidade sira-ne’e hodi halo servisu.

“Ami halo ona planu no dezeñu atu hein se COVID-19 ne’e mak hahú tun ami prontu atu ba dezenvolve planu iha munisípiu tolu ne’ebé prontu ona oferese fasilidade ba ami, atu nune’e, ita nia komunidade no autoridade munisípiu sira labele dependénsia ba media nasionál,” Merício Akara hateten.

Governante ne’e informa katak bainhira nia hetan kompeténsia hosi Ministériu Asuntu Parlamentár no Komunikasaun Sosiál (MAPKOMS) hodi jere Dirasaun Nasionál Dezenvolvimentu Mídia Munisípiu ho orsamentu ne’ebé prevee ba programa ne’e iha  $600.000,00-resin inklui Sentru Formasaun Tékniku Komunikasaun (SEFTEK) mós iha $600.000,00-resin, maibé orsamentu sira-ne’e jere hosi MAPKOMS.

Hafoin asume responsabilidade durante tinan ida, Akara hateten, SEKOMS konsege moderniza ona sistema rádiu komunidade hosi rádiu konvensionál baibain ba radio streaming online.

“Ema bele asesu ona rádiu komunidade sira-ne’e liuhosi sítiu sira  atu bele fó asesu ba ema barak liu, inklui ita nia maluk sira hela iha nasaun seluk. Progresu ida-ne’e mak ami realiza iha tinan ida ne’e,” Merício Juvenal Akara tenik.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here