Profisionál saúde-sira hala’o teste swab ba abitante iha sede suku Caicoli, sesta (07/05). Imajen Tatoli/António Gonçalves.

DILI, 11 maiu 2021 (TATOLI)Ministra Saúde, Odete Maria Freitas Belo, hateten maski Governu implementa Serka Sanitária no konfinamentu domisiliáriu obrigatóriu jerál durante loron 14 ho objetivu redús propagasaun surtu COVID-19 iha Timor-Leste liuliu munisípiu Dili, maibé komunidade ladún kumpre ho di’ak.

Tuir Governante ne’e, loloos la presiza aplika teste swab masál bainhira komunidade sira iha konsiénsia durante loron 14 bele hela hakmatek iha uma atubele rezolve propagasaun COVID-19.

“Maibé kondisaun agora iha ona konfinamentu obrigatóriu maibé kontinua la’o bá-mai sein uza máskara, entaun Ministériu Saúde (MS) nota katak ho regra ne’ebé Governu fó sai, ita rasik la kumpre, entaun ita la garante katak ho implementasaun konfinamentu obrigatóriu ne’e bele iha rezultadu di’ak ruma,” Ministra hateten hafoin ramata reuniaun ho Primeiru-Ministru, Taur Matan Ruak, iha Rezidénsia Farol, tersa ne’e.

Notísia relevante: EE da-XIII: sidadaun hotu iha territóriu nasionál obrigatóriu teste swab

Governante ne’e klarifika, objetivu hosi teste swab masál ne’ebé daudaun halo atu identifika vírus iha ema ida-idak ninia isin lolon.

“Teste swab masál la’ós atu redús kazu, maibé atu identifika katak ita ne’e moris hela ho COVID-19 ne’e ka lae, no bainhira identifika katak ita ho vírus ne’e, entaun iha obrigasaun atu konfina-an, tantu iha fatin ne’ebé Governu prepara ka ita-nia uma. Importante labele sai lai nune’e vírus labele espalla ba ema seluk,” nia akresenta.

Nune’e, Ministra Saúde husu ba sidadaun ne’ebé rezultadu teste swab hatudu pozitivu COVID-19, atu hakmatek iha uma hodi hein ekipa saúde ba tula lori ba fatin izolamentu ne’ebé prepara.

“Ko’alia kona-ba transmisaun komunitária, signifika iha Dili laran hotu-hotu kontaminadu COVID-19, entaun ekipa saúde sira tenke tun ba fatin hotu atu identifika no dala ruma sira laiha tempu atu ba kolleta ema ne’ebé pozitivu ona, maibé la signifika komunidade livre la’o bá-mai. Tanba ne’e kuandu notifika pozitivu, halo favór hela iha uma atu nune’e vírus ne’e labele daet fali ba ema seluk, la’ós tanba de’it ema bá foti tarde tenke la’o bá-mai, ne’e konsiénsia laiha,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here