Diretór Nasionál Aprovizionamentu, Quintiliano Belo. Imajen TATOLI/Florêncio Miranda Ximenes

DILI, 11 maiu 2021 (TATOLI)--Ministériu Obra Públiku (MOP) liuhosi Diresaun Nasionál Aprovizionamentu (DNA) finaliza ona evaluasaun téknika no finansiál ba empreza lokál sira ne’ebé kompete iha konkursu públiku ba projetu estrada rurál iha munisípiu hitu.

Diretór Nasionál Aprovizionamentu, Quintiliano Belo, hateten DNA  hamutuk ho ekipa estrada rurál, loke ona konkursu ba  munisipiu  hitu hanesan Baucau, Ainaro, Manatuto, Dili, Manufahi, Laútem no Viqueque.

“Hafoin ami simu hodi finaliza ona verifikasaun prévia ba dezeñu no Bill of Quantity (BoQ) ne’ebé halo hosi Ajénsia Dezenvolvimentu Nasionál (ADN) ho totál pakote estrada rurál hamutuk 136.  Hosi totál ne’e MOP-DNA halo ona konkursu no aprovizionamentu ba pakote 67,” Diretór Nasionál ne’e hateten ba Agência TATOLI iha ninia knaar fatin Caicoli, Dili, tersa ne’e.

Tuir nia, hosi pakote 67, DNA mak responsabliza  prosesu aprovisionamentu, ne’ebé konsege finaliza evaluasaun dokumentu tékniku no finansiál ba kompaña lokál  60-resin ne’ebé kompete pakote estrada rurál hamutuk 37 iha munisípiu hitu.

“Kada empreza sei hetan pakote ida tuir rekursu tuir kapasidade finansiál, ekipamentu no esperiénsia sira,” Responsavél ne’e akresenta.

Aleinde ne’e, iha mós pakote 69 ne’ebé sei halo prosesu aprovisionamentu iha Komisaun Nasionál Aprovizionamentu (CNA, sigla Portugés) ne’ebé loke daudaun ona iha munisípiu Baucau no Bobonaro, ne’ebé sei kontinua nafatin loke ba munisípiu seluk ba públiku hodi atinje númeru ne’ebé aprovadu ona iha Parlamentu Nasional.

Nune’e, MOP-DNA sei lansa konkursu públiku ba munisípiu lima seluk hanesan Aileu, Ermera, Liquiçá, Covalima no Bobonaro, ho totál pakote estrada rurál hamutuk 30 hafoin situasaun Serka Sanitária.

Konkursu públiku ne’e ho baze ba orientasaun Ministru Obra Públiku, Salvador Eugênio Soares dos Reis Pires, atu kontratór sira ne’ebé sai vensedór tenke mobiliza no ezekuta obra sira tuir tempu ne’ebé iha, hodi fasilita  komunidade sira área rurál bele asesu estrada ho di’ak.

Jornalista: Florêncio Miranda Ximenes

Editora: Julia Chatarina

1 KOMENTÁRIU

  1. Husu deit ba Ex-mo Diretor Nasional Aprovisionamento DNA oinsa ho Estrada rural suco Lisapat,posto administrativo hatolia,municipio ermera neébe sukat ona husi ILO iha tinan 2012

HAKEREK NO HATÁN

Please enter your comment!
Please enter your name here