Kondisaun uma komunidade iha aldeia Moris Foun, Tasi-tolu kauza hosi inundasaun iha 04 abríl. Imajen Tatoli/Eugénio Pereira.

DILI, 11 maiu 2021 (TATOLI)—Sekretária Estadu Protesaun Sivíl (SEPS), kalkula kustu estimativa ba apoiu rekoperasaun liuliu ba rekonstrusaun uma ne’ebé hetan estragu durante dezastre natural, hamutuk millaun $42.

“Ita-nia kustu estimative, propoin ba fundu kontijénsia hamutuk millaun $42,’’ SEPS, Joaquim Gusmão, hateten ba jornalista Agéncia Tatoli, iha kna’ar fatin Caicoli, segunda ne’e.

Notísia relevante:SEPS husu millaun $12 ba akizasaun nesesidade bázika

Nia dehan, ekipa liña ministériu uza formuláriu multi Assessment hodi halo levantamentu ba uma sira ne’ebé hetan estragu no daudaun ne’e prosesu identifikasaun ba dadus tama ona sei verifika ho loloos  mak bele fó apoiu.

Governante ne’e hatutan, liña ministériu mós diskute hela mekanizmu no métodu oinsá bele fó  apoiu ba família-sira, hodi haree ba uma ne’ebé hela permanente ka provizóriu, sei iha desizaun.

Tuir padraun SEPS, apoiu rekoperasaun hanesan materiál konstrusaun ho osan maun de-obra,  maibé benefisiáriu-sira sei simu apoiu la hanesan no ida-idak tuir kategoria  estragu aat kamán, aat natón no aat totál.

Dadus hosi Ministériu Administrasaun Estatál (MAE) ho SEPS, rejista família afetadu dezastre naturál hamutuk 33.177 iha territóriu Timor-Leste (TL). Hosi númeru ne’e, família  besik 90% mak hosi Dili no 10% hosi munisípiu seluk.

Iha rezultadu levantamentu, identifika uma 25.000 mak afetadu, iha uma 24.000  aat kamán, aat natón 553 ho aat totál 554.

Dadus hosi MAE ho SEPS identifika mós família hamutuk 2.558 mak hela iha área risku dezastre naturál hanesan besik mota, foho lolon no lagoa iha munisípiu Dili.

Governu mós sei foti solusaun ba família-sira ba fatin livre, nune’e  prevene afeta inundasaun iha tempu tuir-mai.

Ministériu Justisa (MJ), liu hosi Diresaun Nasionál Teras no Propriedade (DNTP), identifika ona  rai Estadu ne’ebé mamuk iha fatin tolu, atu bele re-aloka vítima dezastre naturál ne’ebé hela iha área risku.

Fatin tolu ne’e nu’udár rai Estadu ho luan ka ektare iha Hera 20-resin, Beduku ektare ne’en (6) no Tibar ektare ne’en (6).

MJ prepara fatin ne’e hodi hein aprezenta ba entidade relevante no kontribui ba planu hosi Ministériu Planu Ordenamentu (MPO), ho Ministériu Obra Públika (MOP), kona-bá urbanizasaun no atu re-aloka família-sira.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here