PM Taur Matan Ruak, horseik, halo visita ba Sentru Formasaun Tibar. imajen/António Gonçalves

DILI, 11 maiu 2021 (TATOLI)—Komisaun D ne’ebé trata asuntu Ekonomia no Dezenvolvimentu rekomenda Governu atu envolve Sentru Nasionál Empregu no  Formasaun Profisionál, I.P-Tibar iha prosesu manutensaun sasán patrimónia estadu nian tanba iha ona pesoál ne’ebé kualifikada.

Notísia Relevante: Governu Sei Investe Maka’as Ba Sentru Formasaun Tibar

“Rekomenda ba Governu, ba oin envolve sentru formasaun sira hanesan Tibar iha prosesu manutensaun ba sasán patrimónia estadu sira-ne’ebé aat tanba sentru ne’e iha ona pesoál sira-ne’ebé kualifikada,” relatóriu fiskalizasaun polítika hosi Komisaun D ne’ebé aprezenta ba plenária, segunda ne’e.

Vizita fiskalizasaun polítika ne’e deputadu sira hosi Komisaun D hala’o iha loron 11 fulan-fevereiru 2021 liubá.

Komisaun D esplika iha relatóriu fiskalizasaun katak, sentru formasaun Tibar hetan ona serfikadu nível internasionál ISO 9001 ne’ebé haree liu kona-ba kualidade jestaun ba formasaun.

“Sentru Formasaun Tibar hakarak asesu ba patrimóniu Estadu sira-ne’ebé aat hodi halo manutensaun atu nune’e bele utiliza fali. Maibé lei limite fali atu labele asesu ba sasán ba sira-ne’e,” Komisaun D akresenta iha relatóriu.

Deputadu sira hosi Komisaun  D nota sentru formasaun Tibar hahú aposta ona iha nível médiu hodi ba nível avansada, liuliu área espesializada kontrusaun no ospitalidade.

Iha fiskalizasaun ne’e, Komisaun D lideradu Deputadu Antoninho Bianco, identifika totál funsionáriu hamutuk na’in-92, espesialista internasionál iha na’in-20, iha área formasaun na’in-14 ho kapasidade alunu to’o na’in-300 kada semestre.

Alunu sira-ne’ebé to’o ohin loron sertifika ona hosi sentru formasaun Tibar hamutuk na’in-5,234. Hosi dadus ne’e seidauk hetan levantamentu formal maibé pelu menus iha ona na’in-129 mak hetan ona kontratu serbisu ho durasaun tinan ida maibé restante seidauk hetan informasaun hosi alunu sira.

Área formasaun ne’ebé aplika iha sentru formasaun Tibar mak hanesan pedreiru, kanalizasaun, eletrisidade, karpintária, soldadura, manutensaun AC no jeleira, manutensaun komputadór no internet, informátika, planifikasaun, kustura no mekánika.

Ho nune’e, Komisaun D rekomenda Governu apoia fundu ba sentru formasaun Tibar atubele reforsa liután atividade formasaun profisionál nune’e bele garante mão de obra ne’ebé kualidade.

Komisaun ne’ebé trata asuntu Ekonomia no Dezenvolvimentu ne’e rekomenda ba sentru formasaun Tibar bao in kontinua mellora liután jestaun ba atividade formasaun nune’e nafatin hetan rekuñesimentu iha nível internasionál.

Notísia Relevante: Tinan 2002-2020, Sentru Formasaun Tibar konsege forma joven 5.234

Jornalista: Evaristo Soares Martins

Editór: Cancio Ximenes 

HAKEREK NO HATÁN

Please enter your comment!
Please enter your name here