Abitante simu vasina AstraZeneca iha lansamentu dozes dahuluk, faze daruak, iha Sentru Saúde Comoro, segunda (10/05/21). Imajen Tatoli/António Gonçalves.

DILI, 11 maiu 2021 (TATOLI)—Deputadu sira hosi Bankada Congresso Nacional de Reconstrução de Timorense (CNRT), mantein pozisaun lakohi simu vasina AstraZeneca tanba konsidera vasina ne’e la garante livre hosi COVID-19.

Notísia Relevante: Funsionáriu PN-deputadu sira simu vasina Astrazeneca

“Ha’u seidauk vasina, tanba Ministra Saúde rasik mai esplika iha plenária, katak vasina ne’e la garante livre hosi COVID-19 tanba ne’e ami idak-idak hola desizaun rasik,” Vise-Xefe Bankada CNRT, Deputadu Patrocínio Fernandes dos Reis, informa ba jornalista sira, iha resintu Parlamentu Nasionál, tersa ne’e.

Nia fundamenta, programa vasinasaun ne’e polítika Governu nian maibé atu submete ba vasina ne’e iha idak-idak nia-aan rasik tanba la’ós obrigatóriu.

“Ne’e desizaun ba ema idak-idak nia vida atu mate no moris. Ha’u mak deside rasik katak ha’u hakarak mate ka ha’u hakarak moris,” nia dehan.

Deputadu Bankada CNRT ne’e seidauk haree barómetru ida katak deputadu hotu-hotu tenke vasina tanba ne’e desizaun iha idak-idak nia liman.

“Ida-ne’e polítika Governu nian maibé atu obriga deputadu hotu-hotu tenke vasina, ne’e ita seidauk iha barometru legál ruma hodi obriga deputadu sira hotu atu vasina. Maske Vasina ka lae mós la asegura livre hosi COVID-19, entaun ha’u iha direitu hola desizaun rasik ba ha’u-nia aan,” nia dehan.

Iha fatin hanesan, Deputada Bankada CNRT, Bendita Magno, rekuñese maioria hosi bankada refere seidauk simu vasina AstraZeneca.

“Ba ha’u depende de’it, ha’u hakarak vasina, ha’u ba vasina. Sé ha’u la ba vasina, ha’u iha direitu rejeita. Ne’e ha’u-nia direitu tanba iha lei mós hateten labele obriga ema atu tuir vasina. Ha’u-nia imunidade, ha’u rasik mak sente la’ós ema hotu sente. Deputadu sira hosi CNRT seidauk vasina, maibé ami teste swab dala-rua ka tolu ona maibé rezultadu negativu,” nia hateten.

Entertantu Deputadu Bankada FRETILIN, Antoninho Bianco, hateten loloos ne’e membru órgaun soberanu sira mak tenke hatudu ezemplu ba povu kona-ba programa vasinasaun ne’e.

“Deputadu sira balun vasina ona ka seidauk, tanba ita atu hatudu ba povu tanba ita labele lori fali virus hadaet ba povu simples. Ita la’ós imune (imunidade) ba virus ne’e, tanba ne’e di’akliu membru órgaun soberanu sira tenke vasina, ne’e ha’u-nia hanoin,” nia fó hanoin.

Notísia Relevante: PPN konvida ema hotu partisipa no kolabora programa vasinasaun

Deputada Olinda Guterres seidauk simu vasina

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here