Ministra Saúde, Odete Maria Freitas Belo. Imajen Tatoli /Egas Cristovão.

DILI, 11 maiu 2021 (TATOLI)Ekipa téknika saúde Austrália (AUSMAT, sigla ingles) hato’o relatóriu levantamentu ne’ebé sira halo ba fasilidade saúde sira ligadu ho prevensaun surtu COVID-19 iha Timor-Leste.

Rezultadu levantamentu identifika katak jestaun iha fatin kuarentena sira ladún di’ak inklui iha Hospital Nasional Guidu Valadares (HNGV), tanba ne’e ekipa sujere atu Ministériu Saúde (MS) hadi’a jestaun.

Tuir Ministra Saúde, Odete Maria Freitas Belo, kestaun importante balun hosi levantamentu maka haree ba fatin tanba ho akontesementu foin lalais, hatudu katak entidade responsável saúde sira presiza hadi’a di’ak liután jestaun atendimentu pasiente.

“Ami nafatin simu rekomendasaun sira no halo tuir. Sira haree jestaun iha kuarentena, izolamentu, inklui protokolu sira ne’ebé maka iha, karik aplika ka lae, entaun sira husu atu hadi’a buat ne’ebé presiza atu hadi’a,” Ministra Odete Maria, relata hafoin ramata reuniaun ho Primeiru-Ministru, Taur Matan Ruak, iha Rezidénsia Farol, tersa ne’e.

Kona-ba izolamentu, MS identifika ona fatin balun hanesan iha Mall Golgota, ne’ebé daudaun ne’e jerente hamamuk ona inklui Eskola STM Becora.

“Fatin hirak ne’e mak identifika hela atu transforma hanesan izolamentu ba kazu asintomátiku COVID-19, maibé MS la autoriza ema sira ne’ebé ho sintoma COVID-19 hela iha uma tanba bele monu lalais liu ba kazu moderadu,” nia akresenta.

Biban ne’e, Ministra Saúde klarifika informasaun ne’ebé dehan sidadaun balun iha kuarentena toba de’it iha biti loos duni, tanba ne’e daudaun MS halo hela kompra sasán sira hanesan kulsaun no kama.

“Ami halo hela kompra, maibé buka kama iha fatin karpentaria sira ne’e laiha, sé karik ita-nia karpinteiru sira hatene haree situasaun agora daudaun, entaun sira tenke halo kama barak, maibé la akontese, sira halo armáriu mak barak fali. Tanba iha rai-laran laiha, ami sosa hosi li’ur no haree ba situasaun ne’e halo atrazu oituan,” nia haktuir.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here