Estudante hosi suku Usitasa’e, Sub Rejiaun Oe-silo, Rejiaun Administrativa Espesiál Oecusse Ambeno (RAEOA), ne’ebé halibur an iha USET, simu nesesidade bázika hosi Timor Leste Vision, segunda (10/05/21). Imajen/USET.

DILI, 10 maiu 2021 (TATOLI)—Organizasaun Timor Leste Vision (TLV), apoia foos saka 132 ba estudante hosi suku Usitasa’e, Sub Rejiaun Oe-silo, Rejiaun Administrativa Espesiál Oecusse Ambeno (RAEOA), ne’ebé hala’o estudu iha Dili. Estudante hosi suku ne’e, halibur-an iha Uni Solidariedade Estudante Usitasa’e (USET), hamutuk 150-resin.

Prezidente TLV, Abel da Costa hateten, apoiu ne’e atu bele tulun diak-liu tan alin estudante-sira ne’ebé mai hosi Oecusse, liu liu hosi suku Usitasa’e, ne’ebé hala’o estudu iha Dili, tanba fulan hira ona mak transporte marítima labele halo operasaun.

Notísia relevante:Austrália apoiu tenda 220 ba vítima dezastre naturál iha Timor-Leste

“Inundasaun ne’ebé akontese iha 04 abríl, afeta makaas ba estudante-sira. Alende ne’e, situasaun serka sanitária mós fanun organizasaun ne’e hodi husu maluk-sira iha Austrália atu bele fó apoiu ba problema ne’e. Iha mobilizasaun ne’e, ita halo kampaña liu hosi online, off line, no ita hetan reasaun pozitivu hosi ita-nia rede,” Abel da Costa hateten ba jornalista Agência Tatoli, hafoin oferese foos ba estudante-sira iha kost, Fatuhada, segunda ne’e.

Apoiu ne’ebé TLV hetan hosi maluk-sira iha Austrália, konsege fó mós apoiu ba abitante lubuk ida ne’ebé afeitadu ba inundasaun hanesan Metinaro, Hera, Dili laran, no iha mós fatin lubuk ida, inklui estudante hosi Oecusse.

“Agora daudaun, ami prontu nafatin atu fó apoiu tuir kapasidade ne’ebé iha,” nia hateten.

Nia esplika, TLV hanesan organizasaun ida ne’ebé harii iha 2004, hosi Timoroan-sira hamutuk ho maluk Australianu-sira ho voluntariamente.

Objetivu hosi ezisténsia organizasaun ne’e, atu buka fundu hodi bele fó apoiu ba área edukasaun no saneamentu iha TL no kontinua hala’o serbisu ativu to’o ohin loron.

Iha fatin hanesan, kooderandór posko umanitária USET, José Mala, agradese ba TLV ne’ebé apoia ona estudante-sira hosi Oecusse, liuliu hosi suku Usitasa’e, ne’ebé namkari iha Dili laran, hodi bele sustenta-an durante serka sanitária.

“Ami agradese ba TLV ne’ebé ajuda ona ami, tanba durante periúdu serka sanitária kolega barak mak susar tebes atu asesu ba ai-han,” José Mala, agradese.

Nia esplika, estudante hirak-ne’e, maioria frekuenta hela sira-nia estudu iha universidade públiku no privada-sira iha Dili laran, no balun tuir hela formasaun naun formál, hanesan kursu kona-bá komputadór, kursu Lian Inlgés, Lian Koreia no seluk tan.

Nia hatutan, foos saka 132 ne’ebé TLV oferese, konsege distribui duni ba maluk estudante hamutuk 132 iha ida-idak nia-fatin  ka kost, ne’ebé hetan mós apoiu lojístika hosi TLV.

“Ita konsege distribui hotu, kada ema hetan foos saka ida ho kilograma 25, mina bimoli masa ida no masin falun 2,” nia hateten.

Benefisiáriu, Antão Poto agradese ba apoiu ne’e tanba durante serka sanitária susar duni atu hetan ai-hán.

“Ha’u agradese ba TLV tanba apoia ona ami. Ami presija duni iha tempu ida ne’e, tanba agora buat ida laiha duni,” estudante ne’e agradese.

Entretantu, estudante Usitasa’e-oan iha Dili, ne’ebé hamahan-an iha USET, estabelese ona posko umanitária iha Caicoli, Dili iha 22 marsu 2021, hodi buka mós fundu atu responde nesesidade estudante sira-nian durante periúdu Estadu emerjénsia.

Apoiu ne’ebé TLV oferese, tanba serbisu hamutuk mós ho USET.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here