DILI, 10 maiu 2021 (TATOLI)—Embaixadora Malázia iha Timor-Leste, Sarimah Akbar, hateten, timor-oan sira ne’ebé hela iha Kuala Lumpur, Malázia bele simu vasina prevensaun COVID-19.
“Sidadaun Ttimor-oan iha Malázia bele simu vasina ho gratuita tanba iha Timor-Leste mós autoriza ema estranjeiru sira bele simu vasina, nune’e mós iha Malázia,” Embaixadora Sarimah Akbar, hateten hafoin ramata reuniaun ho Primeiru-Ministru, Taur Matan Ruak, iha Rezidénsia Farol, segunda ne’e.
Notísia relevante: Embaixadora Malázia agradese Governu Timor-Leste disponibiliza vasina ba diplomata sira
Nune’e, Diplomata ne’e husu timor-oan sira iha Malázia atu uza oportunidade ho di’ak atu simu vasina.
“Husu hotu-hotu aproveita oportunidade ne’e, keta halo ba liu tiha ida ne’e tenke selu ona karik ita lahatene loos, daudaun ne’e gratuita tanba ne’e tenke koopera hodi simu vasina,” nia enkoraja.
Tuir nia, Malázia uza tipu vasina oin tolu hanesan Pfizer, AstaZeneca, no Sinovac hosi Xina.
Jornalista: Antónia Gusmão
Editora: Julia Chatarina
