Semáforu iha Supermerkadu Leader la funsiona. Imajen TATOLI/Natalino Costa

DILI, 10 maiu 2021 (TATOLI)Diresaun Nasionál  Transporte no Terrestre (DNTT) submete ona pedidu konkursu manutensaun semáforu iha dalan protokolu kapitál Dili, ba Ministériu Transporte no Komunikasaun (MTK).

Lampu merah (semáforu) ne’ebé a’at ho kategoria a’at totál no pedidu ba konkursu manutensaun rasik, ami submete ona ba parte Ministériu Transporte no Komunikasaun atu halo prosesu no bainhira iha ona rezultadu, ami orienta ona kompañia halo manutensaun,” Xefe Departementu  Sinál no Tráfiku DNTT, João Eugênio da Silva, ba Agência TATOLI, via telefónika, segunda ne’e.

Nia dehan, sumáforu haat ne’ebé maka a’at iha Supermerkadu Leader oin, Palásiu Prezidensiál nia sorin a’at kauza hosi inudasaun foin daudaun, somáforu iha dirasaun Bidau Toko Baru no ida iha Bidau Lecidere, eis Burger King nian.

“Ita iha lampu merah hamutuk 11 iha kapitál Dili, maibé ualu mak funsiona normál, haat seluk la funsiona. Tanba ne’e ami loke konkursu hodi indika kompañia ida halo manutensaun nune’e bele funsiona hotu, fiar tinan ne’e sinál sira bele funsiona hotu,” nia akresenta.

Tuir João Eugênio, durante ne’e parte DNTT tenta atu halo intervensaun hadi’a sinál tránzitu ne’ebé a’at, maibé ba hirak ne’ebé grave sei labele halo manutensaun tanba diresaun seidauk iha fasilidade adekuadu.

Jornalista: Natalino Costa   

Editora: Julia Chatarina

HAKEREK NO HATÁN

Please enter your comment!
Please enter your name here