Sekretária Estadu Igualdade no Inklusaun, Maria Jose da Fonseca Monteiro de Jesus. Imajen TATOLI/ Egas Cristovão.

DILI, 10 maiu 2021 (TATOLI)—Governu liuhosi Sekretária Estadu Igualdade Inkluzaun (SEII) sei fó apoiu nafatin ba liña frente liuliu feto sira hanesan doutora, enfermeira no serbisu iha liña frente seluk ne’ebé involve mós feto atu prevene no kombate COVID-19 iha Timor-Leste.

“Ami enkoraja nafatin ita-boot sira, ba doutór, enfermeira, parte FALINTIL-Forsa Defeza  Timor-Leste no Polísia Nasionál Timor-Leste (F-FDTL, PNTL) no pesoál serbisu esensiál seluk atu kontinua hala’o imi-nia servisu ho profisionalizmu hodi kontinua halo serbisu di’ak ba ita-nia povu liuliu feto, ferik-katuas, ema portadora defisiénsia no komponente vulnerável seluk iha ita-nia rai-laran, atu bele kombate COVID-19 iha Timor-Leste” Sekretária Estadu Igualdade Inkluzaun (SEII), Maria José Fonseca de Jesus, hateten liuhosi komunikadu imprensa ne’ebé Agência Tataoli asesu, segunda ne’e.

SEII hanesan Instituisaun Estadu ne’ebé tau-matan ba asuntu igualdade no inkluzaun iha Timor-Leste fó apoiu no solidariedade tomak ba serbisu na’in sira iha liña frente atu kombate COVID-19 iha Timor-Leste.

Governante ne’e hateten, serbisu liña frente sira-ne’e liuliu feto sira, bainhira hala’o knasr iha terrenu ne’e populasaun sira trata sira, sira balun hetan ameasa to’o balun hetan kanek tanba ema tuda no selu-seluk tán. 

“Ida-ne’e fó presaun psikolójia tebes ba Serbisu na’in liña frente sira liuliu ba feto sira hanesan doutora, enfermeira no serbisu liña frente seluk ne’ebé iha mós feto barak iha laran. Ita tenke enkoraja sira hodi hala’o sira-nia serbisu,” nia dehan.

SEEI husu ba populasaun sira atu kontinua kumpre nafatin medida preventiva hanesan uza maskára, fase liman beibeik ho sabaub ka uza hand sanitizer, distansiamentu sosiál no fíziku no evita halibur malu ho finalidade garante saúde di’ak ba timor-oan hotu.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here