Ministru Obra Públika, Salvador Eugênio Soares Dos Reis Pires, konvoka enkontru ho entidade tutela MOP sira, iha salaun enkontru Hotel Novo Turismo, Lecidere, segunda (10/05). Imajen TATOLI/Florêncio Miranda Ximenes

DILI, 10 maiu 2021 (TATOLI)--Ministru Obra Públika, Salvador Eugênio Soares Dos Reis Pires, realiza enkontru dahuluk ho entidade ne’ebé tutela direta ba Ministériu Obra Públika (MOP) hodi avalia planu ezekusaun 2021.

Instituisaun hirak ne’e mak hanesan  Bee Timor-Leste, Empreza Públika (BTL, E.P), Eletrisidade de Timor-Leste, Empreza Públika (EDTL, E.P) no  Diresaun Obra Públika sira inklui Institutu Jestaun no Ekipamentu, Insititu Públiku (IGE, I.P, sigla portugés).

“Ami enkontru hodi haree planu ezekusaun ne’ebé orsamenta ona iha tinan 2021, liuliu halo diskusaun preperativu, dezafiu no asaun sira ne’ebé tenke halo iha tempu badak liuhosi koordenasaun ho parte relevante sira, nune’e bele rezolve dezafiu no presta serbisu di’ak ba públiku,” Ministru Salvador hateten iha salaun Hotel Novo Turismo, Lecidere, Dili, segunda ne’e.

Governante ne’e haktuir, enkontru dahuluk ho direjente empreza públika no insitutu públiku iha ámbitu reforma insititusionál konsege realiza ona iha tinan kotuk (2020), hafoin tinan ne’e (2021) sira operasionaliza atu haree atividade estabelesementu no ezekusaun orsamentál kada instituisaun inklui dezafiu sira ne’ebé hasoru.

Kona-ba dezafiu, tuir Ministru hafoin estabelese instituisaun hirak ne’e, enfrenta falta rekursu umanu, tanba ne’e BTL no EDTL presiza halo rekrutamentu hodi kompleta estrutura hodi ezekuta planu no programa ne’ebé prevee ona iha orsamentu 2021.

Daudaun ne’e, EDTL hamutuk ho Komisaun Funsaun Públika (KFP) halo ona transférensia funsionáriu públiku  ne’ebé foti lisensa tinan ida hodi serbisu ba empreza estatál ne’e no kontinua rekrutamentu ba rekursu umanu hodi prepara ezekusaun planu.

“Ami ohin diskute programa eletrifikasaun nasionál, ne’ebé foin finaliza iha prosesu dokumentasaun no tempu badak atu halo konkursu atu sosa materiál no komesa hahú halo instalasaun eletrisidade ba suku 32 ho projetu 32, hanesan konkursu ba kombustível no seluk tan  ho Timor Gás no Petróleu, Empreza Públika (Timor GAP, E.P) no Komisaun Nasionál Apovizionamentu (CNA, sigla portugés) inklui dezafiu sira ne’ebé sira relata,” nia hatutan.

EDTL hahú ona halo estabelesementu Diresaun Servisu Koorporativu Internál, ne’ebé foku ba atividade prosesu administrativa no sistema finaseira liuhosi atualizasaun sistema transparánsia portál ka free balance.

Alokasaun orsamentu 2021 ba EDTL hamutuk millaun $157, ne’ebé 90%  ba akizasaun kombustível no iha kapitál dezenvolvimentu iha orsamentu millaun $12-resin atu halo preparativu dada liña distribuisaun ba suku 67 sira ne’ebé seidauk asesu eletrisidade.

Enkuantu, BTL mós prevee millaun $36 ne’ebé foin dahuluk halo tranférensia hosi Ministériu Finansa (MF) ho 50%, nune’e hahú prepara hela projetu sistema bee-moos ba postu administrativu 35 ne’ebé orsamenta ona iha tinan ne’e.

Alende ne’e, EDTL no BTL mós atualiza progresu normalizasaun estragu kauza dezastre naturál ne’ebé akontese iha 04 abríl no preparasaun ba rekuperasaun sira.

“Ita-nia instituisaun rua ne’e daudaun esforsu hela atu halo normalizasaun ne’ebé kuaze atu finaliza ona no kontinua parte balun ne’ebé seidauk, nune’e komunidade bele asesu bee no eletrisidade ho di’ak,” Ministru subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here