Inspetór Jerál Traballu, Rofino Lopes dos Reis. Imajen TATOLI/Antónia Gusmão

DILI, 10 maiu 2021 (TATOLI)—Inspesaun Jerál ba Traballu (IGT, sigla portugés) rejista empreza haat hasoru difikuldade finanseira durante períodu Serka Sanitária.

“Iha Serka Sanitária fulan kotuk, iha empreza haat maka komunika ba ami hodi hato’o sira-nia difikuldade, hodi dehan bainhira situasaun Serka Sanitária kontinua nafatin hanesan ne’e, maka sira iha difikuldade atu selu traballadór,” Inspetór Jerál Traballu, Rofino Lopes dos Reis, hateten ba Agência TATOLI, via telefónika, segunda ne’e.

Maski nune’e, IGT tenta esplika ona situasaun ba empreza sira liga ho programa Governu atu fó apoiu ba empreza sira ne’ebé rejista ona iha Institutu Nasionál Seguransa Sosiál (INSS).

“Iha períodu Estadu Emerjénsia, maski Governu seidauk deside buat ruma, maibé tenta esplika ba empreza sira atu mantein traballadór no fiar katak  Governu sei deside buat ruma,” nia akresenta.

Nia dehan, empreza haat ne’ebé komunika ho IGT, ida maka envolve direta iha konstrusaun Portu Tibar,  Heineken no rua seluk hanesan loja kiik.

“Hanesan empreza ne’ebé envolve iha Portu Tibar, sira preokupa tanba iha  traballadór barak, maibé balun la servisu no empreza kontinua selu 50%. Maski situasaun difíisil maibé empreza maka buka meiu oinsá hodi sustenta traballadór maski la halo serbisu,” nia haktuir.

Nune’e mós, Heineken hasoru difikuldade atu selu traballadór sira, maibé empreza buka meiu nafatin hodi selu.

Enkuantu kona-ba problema traballadór, durante impozisaun Serka Sanitária, IGT seidauk simu keixa ruma liga ho ambiente serbisu.

“IJT husu empreza sira atu labele hakotu relasaun serbisu ho traballadór, tanba antes ne’e Governu komprometidu atu apoiu empreza ne’ebé hasoru difikuldade liuhosi Seguransa Sosiál, liga situasaun Estadu Emerjénsia no Serka Sanitaria kauza hosi COVID-19,” Inspetór ne’e fó hanoin.

To’o oras ne’e INSS rejista ona empreza privadu foun hamutuk 5.000 hodi sai benefisiáriu ba programa Governu.

Iha orsamentu 2021, Governu prevee millaun $123,9 ba pakote rekuperasaun ekonómika ho objetivu atu hasa’e empregu, investe iha kapitál sosiál, no promove setór produtivu hodi kontribui ba kreximentu ekonómika.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here