Plantasaun multi bebida Heineken iha Hera. Imajen/Heineken

DILI, 10 maiu 2021 (TATOLI)–Inspetór Jerál Traballu, Rofino Lopes dos Reis, hateten, daudaun ne’e empreza Heineken hasoru difikuldade finanseira, tanba ne’e husu Governu atu fó flesibilidade.

“Sira halo karta mai, ne’ebé mensiona katak sira hasoru difikuldade atu selu traballadór no sira husu atu Govenu bele fó toleránsia ba taxa no buat seluk tanba sira laiha rendimentu, tanba ne’e sira husu keringan hosi Estadu liga ho situasaun Estadu Emerjénsia no Serka Sanitária,” Ispetór ne’e dehan ba Agência TATOLI, via telefónika, segunda ne’e.

Iha sorin, Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, haktuir, foin daudaun empreza Heineken halo pedidu atu atualiza situasaun merkadu no dokumentu hanesan sertidaun no sertifikadu sira.

Diretór ne’e dehan, empreza husu Govenu fó flesibilidade, tanba ne’e presiza konsidera tanba iha tinan lima ba kotuk Governu rasik konkorda no fó apoia Heineken halo investimentu, maibé agora hasoru situasaun difísil, presiza hatan.

“Sira iha difikuldade finanseira tanba dehan selu taxa a’as, selu eletrisidade a’as, enkuantu iha merkadu laiha ona rendimentu, tanba ne’e ita buka atu trava oituan lai ba sira, iha tempu balun tuir mai mak nia bele selu, maibé agora situasaun hanesan ne’e nia atu hamenus kustu operasionál ninian,” nia subliña.

Tuir nia, presiza tau-matan tanba empreza ne’e fó serbisu ba timor-oan barak.

“Ba kestaun ne’e, ha’u fó ona dadus ba Ministériu Koordenadór Asuntu Ekonómiku atu buka solusaun,” nia akresenta.

Heineken asina akordu investimentu ho Governu Timor-Leste iha janeiru 2015 no akordu ba rai hodi harii plantasaun iha Hera iha juñu 2015, maibé produsaun hahú iha janeiru 2017.

Empreza ne’e hanesan investidór estranjeiru dahuluk ne’ebé maka investe iha setór fabrikasaun ne’ebé oras ne’e daudaun kria empregu direta no indireta ba timor-oan hamutuk 600 resin.

Plantasaun multi bebida Heineken gasta ona millaun $38 hodi harii indústria ho klase mundiál no sei prodúz serveja oin-oin ho marka internasionál hanesan,  Bintang, Tiger, ABC,  inklui bebida naun alkól seluk tan.

Heineken hanesan serveja marka koñesidu iha mundu ne’ebé investe ona iha nasaun 170-resin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here