Prezidente Konsellu Administrasaun EDTL,EP, Paulo da Silva. Imajen TATOLI/Egas Cristóvão

DILI, 10 maiu 2021 (TATOLI)-Eletrisidade de Timor-Leste, Empreza Públika (EDTL,E.P) husu ba empreza Timor Gás no Petróleu, Empreza Públika (Timor GAP, E.P) atu kumpre kalendáriu fornese kombustível ba setrál elétrika Betano, hahú aban, tersa (11/05).  

Prezidente Konsellu Administrasaun EDTL,E.P, Paulo da Silva, hateten, tuir loloos bazeia ba kalendáriu kontratu, Timor GAP fornese kombustível iha fulan abríl, maibé tanba halo hela preparasaun hamutuk fornesedór sira, maka hahú fulan ne’e maka fornese.

“Ami foin daudaun bolu ona no halo karta xamada atensaun ba sira (Timor GAP) no husu atu bele hatama iha semana ida ne’e nia laran. Ami fó hatene atu  hatama iha loron 07 no 08 maiu ne’e, maibé hafoin sira halo preparasaun ho sira-nia fornesedór, maka hahú aban mak foin fornese,” Prezidente EDTL, hateten iha Hotel Novo Turismo, Lecidere, Dili, segunda ne’e.

Notísia relevante: EDTL-Timor GAP selebra akordu fornese kombustível iha sentrál elétrika Betano

Tuir nia, bainhira atividde fornesimentu kombustível la kumpre kalendáriu, bele prejudika funsionamentu sentrál elétrika Betano, maibé  EDTL iha esperansa boot katak laiha problema tanba Timor GAP kompromete atu kumpre kaléndáriu fornesimentu.

“Ha’u espera katak laiha problema boot ba sentrál sira, liuliu ahi sei la mate tanba ita garante, maski sira la kumpre kalendáriu, maibé ami halo esforsu oin-oin atu halo jestaun garante sentrál ne’e kontinua funsiona,” nia akresenta.

Timor GAP fornese kombustível ba sentrál elétrika Betano hafoin hetan vistu préviu hosi Tribunal das Contas.

Empreza estatál ne’e sei fornese iha faze tolu, ne’ebé iha faze dahuluk sei fornese litru 10.000 no kontinua fornese ba períodu tinan rua resin ho kustu millaun $50.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here