Tékniku EDTL halo instalasaun eletrisidade iha área Comoro, Dili, kinta (04/04). Imajen TATOLI/António Gonçalves

DILI, 10 maiu 2021 (TATOLI)-Eletrisidade de Timor-Leste, Empreza Públika  (EDTL,E.P) finaliza ona dokumentu halo akizisaun materiál linã distribuisaun hodi instala eletrisidade iha suku 31 hosi totál suku 67 iha territóriu nasionál ne’ebé seidauk asesu.

Ministru Obra Públika, Salvador Eugênio Soares Dos Reis Pires, hateten EDTL aprezenta ona preparasaun atu halo konstrusaun projetu eletrifikasaun 32 iha suku 31 ne’ebé seidauk asesu eletrisidade.

“Ita iha suku 67 ne’ebé seidauk asesu eletrisidade, tuir atividade normál suku 31 mak EDTL finaliza ona dokumentu no prepara ona halo akizasaun materiál infraestrutura ba liña distribuisaun hanesan ai-rin no fiu inklui seluk tan. EDTL rasik mak sei halo rasik tanba sira hanesan empreza,” Ministru Salvador hateten iha salaun Hotel Novo Turismo, Licidere, Dili, segunda ne’e.

Hafoin implementa projetu 32 ne’e, empreza estatál mós kontinua halo dezeñu detalladu ba suku restante ne’ebé seidauk asesu atubele fornese fali iha tinan oin (2022).

“EDTL halo ona preparasaun konkursu akizasaun ekipamentu no materiál konstrusaun, ne’ebé sira mós halo mobilizasaun ba suku sira ne’ebé seidauk asesu, nune’e mós prepara hela dezeñu ba suku restante no kontinua programa solar panél ne’ebé ita orsamenta ona iha tinan ne’e,” nia akresenta.

Iha biban hanesan, Prezidente Konsellu Administrasaun EDTL,E.P, Paulo da Silva, hateten tinan ne’e sei prioritiza suku ne’ebé seidauk asesu eletrisidade.

Tuir dadus empreza estatál ne’e, rasio suku sira ne’ebé seidauk asesu eletridade a’as iha munisípiu Ermera, Manufahi, Viqueque, Covalima no seluk tan.

“Ita prioritiza no promove  projetu 32 ba suku 31 ne’ebé sei asesu iha tinan ne’e (2021) no restu suku 36. Hafoin projetu 32 ne’e lansa ona no hahú implementa maka ita kontinua kedas no promove suku 36, tanba ami hakarak promove obra eletrifikasaun hotu kedan hafoin tinan oin kontinua de’it,” nia hatutan.

Tuir polítika Governu liuhosi EDTL,E.P katak projetu 32 ba suku 31 hakarak finaliza iha tinan ne’e (2021) ho 100% no kotinua ho projetu 36  iha tinan oin.

“Ita hakarak iha tinan oin suku hotu iha terrítoriu nasionál tenke asesu eletrisidade, hodi nune’e ita tama filafali ba nível aldeia sira,” nia tenik.

Orsamentu ba projetu eletrifikasaun suku 67 ne’ebé seidauk asesu eletrisidade hamutuk millaun $12, ne’ebé prevee ona iha orsamentu tinan ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here