Traballadór EDTL halo instalasaun ba liña distribuisaun eletrisidade iha Dili, kinta (04/03). Imajen TATOLI/António Gonçalves

DILI, 10 abríl 2021 (TATOLI)-Eletrisidade de Timor-Leste, Empreza Públika (EDTL,E.P) finaliza ona dezeñu no Bill of Quantity (BoQ) torre transmisaun liña eletrisidade hamutuk hitu hosi 16 ne’ebé hetan estragu tanba dezastre naturál iha fulan kotuk.

“EDTL sei halo rekonstrusaun iha tempu badak,” Ministru Obra Públika, Salvador Eugênio Soares dos Reis Pires, iha salaun Hotel Novo Turismo, Lecidere, Dili, segunda ne’e.

Iha biban hanesan, Prezidente Konsellu Administrasaun EDTL,E.P, Paulo da Silva, hateten ekipa téknika sira halo verifikasaun no konsege identifika estragu infraestrutura eletrifikasaun sira.

“Ita-nia torre hitu mak dezeñu no BoQ hotu ona, maibé ami sei haree modelu rekonstrusaun tanba ita lakohi promove buat sira laiha kualidade, hafoin kada tinan inundasaun sobu hela de’it no ita lakon osan saugate de’it,” Dirijente ne’e afirma.

Nune’e, ekipa téknika sira hahú haree estratéjia halo konstrusaun permanente, liu-liu haree nesesáriu hodi bele halo moru protesaun ou halo mudansa ba  posizaun torre sira.

Prezidente EDTL haktuir, tempu uluk bainhira halo infraestrutura liña transmisaun eletrisidade seidauk iha estudu espesífiku ba kada pontu tanba ne’e iha risku iha área besik torre sira.

“Ita iha risku ameasa hosi torre sira, ne’ebé fatin risku hanesan besik mota no foho lolon ne’ebé ita presiza halo ajustamentu hodi haree ba estratéjia muda posizaun torre, halo barrajen ou moru protesaun,” nia akresenta.

Tékniku hosi empreza estatál ne’e mós kontinua halo levantamentu ba torre sia hodi halo dezeñu no BoQ atu halo rekonstrusaun.

Torre liña transmisaun 16 ne’ebé iha territóriu laran tomak hanesan ida iha Hera, Tibar, Maliana no Suai no iha parte Leste.

Sekretariadu Grande Projetu aloka ona orsamentu millaun $8 atu halo rekuperasaun ho baze mekanizmu implementasaun hosi EDTL,E.P.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here