Imajen/Media PR.

DILI, 10 maiu 2021 (TATOLI)—Parlamentu Nasionál (PN), segunda ne’e aprova projetu-rezolusaun hodi espresa rekuñesimentu ba profisionál ba liña frente sira iha kombate no prevensaun pandemia surtu COVID-19.

Notísia Relevante: PN sei aprova rezolusaun rekuñese serbisu profisionál saúde sira

Votasaun ba projetu-rezolusaun hosi Parlamentu Nasionál númeru 71/V(34) kona-ba espresa rekuñesimentu ba profisionál liña frente iha kombate pandemia surtu COVID-19 no rekomenda ba Governu adosaun medida iha ámbitu prevensaun no kombate pandemia, aprovadu ho rezultadu votasaun 44 no abstensaun 1.

“Ho nune’e projetu-rezolusaun kona-ba espresa rekuñesimentu ba liña frente sira pasa,” Prezidente Parlamentu Nasionál, Deputadu Aniceto Longuinhos Guterres Lopes, , anunsia liuhosi plenária.

Rezolusaun ne’e fó rekuñesimentu ba profisionál saúde sira maibé realsa mós profisionál sira seluk hanesan ajente defeza no seguransa, protesaun sivíl, meiu komunikasaun sosiál sira no mós ajente sira seluk ne’ebé presta serbisu iha vijénsia COVID-19 ne’e.

Proponente ba projetu-rezolusaun ne’e mai hosi deputadu Francisco Miranda Branco, Noé da Silva Silva Ximenes, deputada Elvina Sousa de Carvalho no Olinda Guterres.

Inisiativa ne’e aprovadu hafoin asosiasaun profsionál saúde sira hato’o preokupasaun ba uma fukun relasiona ho profisionál sira hasoru problema oinoin iha ámbitu kombate no prevensaun COVID-19.

Deputadu Francisco Miranda Branco esplika, fezolusaun ida-ne’e nu’udar reasaun Parlamentu Nasionál asaun sistematiku hasoru profisionál sira iha liña frente.

Nia dehan, atu kombate pandemia COVID-19 no redús pandemia iha sosiedade ne’e sidadaun idak-idak nia responsabilidade hodi kumpre regra sira-ne’ebé define tiha ona.

“Ita-nia rezolusaun ne’e mós ita lamenta hahalok sira-ne’ebé latuir espíritu latuir lisan Timor nian ne’ebé iha espíritu ajuda hamutuk iha komunidade, tanba ita haree aktu violénsia no verbál kuaze sistemátiku ne’ebé hasoru fali liña frente sira, liuliu profisionál saúde sira,” Deputadu Branco fundamenta.

Iha rezolusaun ne’e kondena makaas grupu harahun ambulánsia iha Postu Administrativu Uatulari, Munisípiu Viqueque no mós aktu violénsia ne’ebé akontese iha Laulara, Dili no Covalima.

“Ita mós relasa ajente profisionál saúde, ajente forsa no seguransa, protesaun sivíl, traballadór sira-ne’ebé serbisu iha kuarentena, izolamentu no mós meiu komunikasaun sosiál. Sira asume responsabilidade ho krítiku hodi proteje saúde públiku nune’e prevene ita hotu hosi surtu ne’e,” Xefe Bankada FRETILIN ne’e realsa iha nia deklarasaun.

Notísia Relevante: AETL-AMTL husu PN kria lei asegura serbisu profisionál saúde sira

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here