Atividade konstrusaun estrada dirasaun Tasitolu-Tibar, kinta (04/03). Imajen TATOLI/António Gonçalves

DILI, 10 maiu 2021 (TATOLI)--Ministériu Finansa (MF) liuhosi Komisaun Nasional Aprovizionamentu (CNA, sigla Portugés), hahú hosi janeiru 2020 to’o 07 maiu 2021, finaliza ona prosesu konkursu aprovizionamentu projetu hamutuk 107 ho kustu $565.446.270,37.

Projetu-sira ne’e maioria ninia prosesu aprovizionamentu hahú ona no balun iha ona faze finál, ne’ebé tuir kalendáriu sei konklui iha tinan ne’e nia laran.

Tuir nota ne’ebé Agência TATOLI asesu iha segunda ne’e, haktuir iha fonte finansiamentu tolu ba projetu pakote 107, hanesan Fundu Infraestrutura ho montante $328.387.809,65, Fundu la’ós Infraestrutura $21.058.460,72 no Imprestimu hosi Ajénsia Internasionál, Banku Dezenvolvementu Aziátiku (ADB, sigla ingésl), Banku Mundiál no Ajénsia Kooperasaun Internasionál Japaun (JICA, sigla inglés) ho montante $216.000.000.

Projetu pakote 107 ne’e nia modalidade konkursu hanesan konkursu internasionál (ICB, sigla inglés) iha pakote 13, konkursu nasional (NCB, sigla Inglés) ba servisu fornesimentu sasán no konstrusaun estrada nasionál no rurál iha pakote 62.

Enkuantu konkursu restritu (RT) iha pakote 23 no konkursu servisu konsultadoria (RFP, sigla Inglés) iha pakote sia.

Hosi pakote hirak ne’e, modalidade ba aprovizionamentu barak liu mak konstrusaun sivíl ne’ebé nia, ho objetivu atu konstrui infraestrutura prinsipál sira hanesan estrada nasionál, ponte, konstrusaun no estensaun ba Aeroportu Internasionál Prezidente Nicolau Lobato, inklui kontinuasaun ba reabilitasaun no manutensaun ba estrada rurál iha munisípiu sira hanesan Lautém, Baucau, Covalima, Manatuto, Viqueque, Manufahi, Ainaro, Ermera, Bobonaro no Liquiçá.

Aleinde ne’e, iha mós modalidade servisu konsultadoria ba dezeña konstrusaun foun sira no supervizaun ba servisu konstrusaun sivíl.

Modalidade seluk ne’ebé importante mós mak servisu akizisaun no fornesimentu sasán no servisu sira hanesan fornesimentu no instalasaun sistema kabu submarinu iha parte súl Timor-Leste, protesaun barreira mota-sira, protesaun torre eletrisidade ne’ebé ninia pakote balun kompletu no atu tama ona iha faze implementasaun.

“Implementasaun projetu hirak ne’e bele fó benefísiu ba dezenvolvementu nasionál no kontribui hasa’e kreximentu ekonomia iha rai-laran inklui kriasaun empregu ba timor-oan sira,” refere nota MF.

Hafoin Prezidente Repúblika, Francisco Guterres ‘Lú Olo’ promulga Lei Orsamentu Jerál Estadu (OJE) Refitikativu 2021 no públika ona iha Jornal Repúblika, ekipa tékniku hosi MF hahú halo ajustamentu Orsamentu Retifikativu iha sistema ‘Dalan Ba Futuru Timor-Leste’ (DBTL) no DGT.

Nune’e, serbisu ajustamentu ne’e kompleta ona iha kinta semana kotuk no daudaun ne’e sistema kontinua funsiona via online ona.

Iha tinan 2021, MF halo ona levantamentu osan hosi Fundu Petrolíferu ho montante totál $350.000.000, ne’ebé levantamentu dahuluk iha fevereiru 2021 ho montante $200.000.000 no levantamentu daruak iha 28 abríl 2021 ho montante $150.000.000.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here