Profisionál saúde-sira hala’o teste swab ba abitante iha sede suku Caicoli, sesta (07/05). Imajen Tatoli/António Gonçalves.

DILI, 09 maiu 2021 (TATOLI)—Teste swab obrigatóriu ne’ebé ekipa saúde realiza ba abitante hamutuk 367 iha suku Caicoli, postu administrativu Vera Crúz, Munisípiu Dili iha sesta (07/05), rezultadu iha na’in 17 pozitivu COVID-19.

“Ohin ami simu rezultadu hosi ekipa saúde, ita-nia komunidade na’in 17 mak pozitivu,” Xefe Suku Caicoli, Hipólito Marques, hateten ba jornalista Agência Tatoli liuhosi telefónika, domingu ne’e.

Notísia relevante:Abitante Caicoli koopera tebes hodi teste swab obrigatóriu

Autoridade lokál ne’e halo ona kontaktu ho sira ne’ebé pozitivu atu prepara an, nune’e bele kolabora hodi hein ambulánsia ba fatin izolamentu.

Xefe suku ne’e mós klarifika katak, abitante hosi suku ne’e hakarak atu partisipa hotu iha teste swab, maibé la konsege, tanba tuir oráriu hosi parte saúde, suku Caicoli hetan de’it loron ida ba atividade sentinela ativa.

“Ha’u-nia abitante hakarak simu hotu, maibé tempu limitadu tanba teste swab iha Caicoli loron ida de’it. Tanba ne’e, labele kobre hotu,” nia hateten.

Kona-bá vasinasaun AstraZeneca, Xefe suku ne’e hateten, abitante Caicoli sei simu vasina iha 18 maiu, maibé depende ba abitante ne’ebé hakarak simu tanba la’ós obrigatóriu.

“Tuir oráriu, ami-nia suku sei simu vasina iha 18 maiu. Maibé, órden ne’ebé ami simu hosi parte saúde katak, swab mak obrigatóriu no vasina la’ós obrigatóriu. Ha’u sei la obriga abitante-sira bainhira lakohi simu,” nia subliña.

Tuir planu, segunda (10/05) autoridade lokál iha suku ne’e sei halo sensibilizasaun ba komunidade kona-bá vasina AstraZeneca.

Suku Caicoli iha aldeia lima mak hanesan, aldeia Sentru da Unidade, Divino 12, Foho Rai Boot, 05 Tahu Laran, no Sacoco ho totál populasaun hamutuk 5.971. 

Entretantu, Governu liu hosi reuniaun Konsellu Ministru (KM) iha kuarta 05 maiu 2021, aprova ona projetu Dekretu Governu ba alterasaun dahuluk ba Dekretu Governu númeru 14/2021 loron 29 abríl, kona-bá medida ezekusaun deklarasaun Estadu emerjénsia, ne’ebé efetua hosi Dekretu Prezidente Repúblika númeru 24/2021, loron 28 abríl.

Ho alterasaun ida-ne’e individu hotu-hotu iha territóriu nasionál ne’ebé abranje hosi operasaun-sira testájen masal ka aleatória, tuir kritériu-sira ne’ebé define hosi autoridade saúde, obrigadu atu realiza ezame médiku ba diagnóstiku COVID-19, ka infesaun hosi SARS-CoV-2.

Dekretu Governu ne’e mós mensiona katak, abitante ne’ebé rekuza hodi realiza ezame médiku hosi diagnóstika obrigatóriu, sein prejuizu responsabilidade kriminál, sujeita ba izolamentu profilátiku obrigatóriu, iha estabelesimentu saúde, rezidénsia ka iha sentru izolamentu ne’ebé estabelese ba efeitu hosi Estadu.

Iha kazu ida-ne’e, despeza ne’ebé iha relasaun ho izolamentu profilátiku-nian, individu rasik maka selu.

Alende ne’e, sita mós kona-bá, sidadaun hotu-hotu nasionál ka estranjeiru ne’ebé hakarak tama iha territóriu nasionál, tenke hala’o uluk pedidu autorizasaun prévia.

Jornalista: Osória Marques

Editór: Cipriano Colo

HAKEREK NO HATÁN

Please enter your comment!
Please enter your name here