Ilustrasaun COVID-19/Espesial.

DILI, 08 maiu 2021 (TATOLI)—Primeiru-Ministru, Taur Matan Ruak, informa pasiente COVID-19 timoroan na’in-lima ne’ebé daudaun ne’e iha sala izolamentu Vera Cruz, Dili, ho kondisaun grave hodi tau de’it oksijéniu no hetan asisténsia direta hosi doutór no médiku Timor-oan sira.

Notísia Relevante: Kazu pozitivu COVID-19 aumenta, Governu deside halo teste swab masal

Primeiru-Ministru, Taur Matan Ruak. Imajen TATOLI/Egas Cristóvão

“To’o agora Timor-oan na’in haat (4) mak mate ona no Timor-oan na’in-lima agora sofre todan,” Taur Matan Ruuak informa liuhosi diskrsu iha serimónia inaugurasaun Postu Seguransa Unidade Polisia Fronteira (UPF), área Wefauk, Suku Cova, Postu Administrativu Balibo, Munisipiu Bobonaro, kinta (07/05).

Taur konsidera númeru kazu COVID-19 ohin loron rejista sa’e makas, tanba Timor-oan sira ulun to’os hodi lakohi kumpre regra no protokolu ne’ebé Organizasaun Mundiál Saúde (OMS) no Ministériu Saúde sosializa.

Ohin loron kapitál Dili sai tiha ona fatin ka knuuk ba COVID-19 eziste hodi hada’et tutan ba munisipiu sira seluk liu hosi viajen no kontaktu abitante sira-nian ba no mai.

Xefe Governu hatutan, problema COVID-19 sa’e makaas depende ba fatór rua ne’ebé importante mak fatór primeiru evolusaun COVID-19 iha Propinsia Nusa Tengara Timor (NTT) Indonézia sa’e makaas no fatór segundu mak atividade viajen ilegál ne’ebé abitante sira hala’o iha liña fronteira rai no tasi nian.

Nia dehan, bainhira ema hotu haree tuir istória dezenvolvimentu COVID-19 akontese iha Timor-Leste hahú kedas iha fulan marsu to’o dezembru 2020, Timor-Leste halo kontrolu di’ak tebes, no iha fulan dezembru 2020 to’o mai janeiru kontinua ba maiu 2021, Governu no PNTL halo kontrolu susar tebes.

“Agora ita halo kontrolu susar tebes ne’e, tanba atividade viajen ilegál ita-nia komunidade halo transasaun ilegál bele lori moras tama mai ita-nia rain laran,” Taur preokupa.

Tuir dadus ne’ebé Ajénsia Tatoli asesu hosi relatóriu Sentru Integradu Jestaun Krize (SIJK) rejista kazu COVID-19 ativu hamutuk 1.417, kazu rekuperadu 147, kazu kumulativu 2.965.

SIJK mós rejista pasiente pozitivu COVID-19 hamutuk na’in 33 no pasiente na’in 11 hala’o tratamentu iha fatin asteotristia, na’in 17 iha medisina interna no na’in lima (5) ne’ebé grave iha sala pediatria.

Iha biban hanesan, Atuál Ministru Interiór Taur orienta mós Komandu Jerál PNTL atu kontinua destaka membru UPF koopera ho Komandu F-FDTL hodi halo kontrolu másimu iha liña fronteira.

Iha parte seluk, Komandante Jerál PNTL, Komisáriu Polisia, Faustino da Costa dehan, Komandu UPF destaka iha liña fronteira hodi halo kontrolu másimu ba abitante sira atu labele halo viajen ilegál.

Komisáriu Faustino rekoñese, mezmu UPF hasoru dezafiu menus rekursu no ekipamentu, maibé durante tinan 2020 to’o 2021, UPF detein abitante kuaze 1000 liu ne’ebé halo viajen ilegál. Abitante hirak ne’e UPF detein iha postu sira-ne’ebé destaka iha área Covalima, Bobonaro no Oé-Cusse nian.

Membru UPF hamutuk na’in-363 kompostu hosi feto na’in-16 no mane na’in-347 hala’o sira-nia knaar fó seguransa iha aeroportu no fronteira sira, hodi hala’o patrulla hale’u pista, terminál no aeroportu ho kooperasaun hamutuk ho parte interesada sira seluk no knaar lejítimu sira seluk, tuir nia misaun.

Notísia Relevante: COVID-19: pozitivu 95 iha Dili

Jornalista: Eugénio Pereira

Editór: Cancio Ximenes

HAKEREK NO HATÁN

Please enter your comment!
Please enter your name here