Diretór Ezekutivu ANAAA, Edmundo da Silva Viegas. Imajen/UNILAB

DILI, 08 maiu 2021 (TATOLI) –  Ajénsia Nasionál Akreditasaun  no Avaliasaun Akadémiku (ANAAA), tinan ida ne’e, hetan alokasaun orsamentu jerál estadu (OJE) 2021 $426,865. Hosi totál orsamentu ne’e, ANAAA foin ezekuta 12% ekivalente ho rihun $50-resin ba kategoria saláriu funsionáriu ANAAA nian, reuniaun membru Konsellu Diretivu ANAAA nian, internet, telefone no jornál.

Diretór ANAAA, Edmundo da Silva Viegas, informa ezekusaun foin atinje 12% iha primeiru trimestre ne’e sei hanesan mós iha segundu trimestre. Maibé tama ba terseiru trimestre, ANAAA garante katak ezekusaun sei sa’e maka’as tanba planu programa ANAAA nian ba akreditasaun no re-akreditasaun sei hahú iha periodu ida-ne’e.

“Terseiru trimestre ne’e ami tenke aselera duni ninia ezekusaun tanba ita simu ona lista kursu 34 no prepara hela sira no Instituisaun Ensinu Superiór Públiku no Privadu (IESPP) ualu  (8) ne’ebé atu hetan avaliasaun. Planu sira-ne’e ami sei realiza iha juñu-jullu, tinan ne’e,” diretór Edmundo Viegas, hateten ba jornalista iha nia servisu fatin, Edifísiu ANAAA iha Dili,  sesta ne’e.

Edmundo afirma katak programa prioritáriu ne’ebé ANAAA pretende atu realiza iha 2021 maka akreditasaun ba kursu sira ne’ebé mak seidauk hetan akreditasaun iha Instituisaun Ensinu Superiór akreditadu 14 no re-akreditasaun ba IIESPP ualu ne’ebé hetan akreditasaun ikus iha 2015.

“Ami halo ona kontaktu ho IESPP sira hahú iha  janeiru kotuk no ami hetan ona kursu 34, kursu bacharalato no lisensiatura hamutuk 25 no post-graduasaun no mestradu hamutuk sia atu tuir akreditasaun”.

Nia afirma katak ba prosesu re-akreditasaun, ANAAA sei foku ba IESPP ualu ne’ebé hetan akreditasaun ikus iha 2015 ne’ebé tuir loloos atu hetan fali re-akreditasaun iha tinan kotuk, maibé tanba ANAAA ninia orsamentu la to’o inklui mós situasaun rai laran hasoru hela pandemia COVID-19 entaun ANAAA adia ba tinan ida ne’e.

Nia informa katak IESPP ualu atu hetan re-akreditasaun iha tinan ida ne’e maka Universidade Nasional Timor Lorosa’e (UNTL), Universidade da Paz  (UNPAZ), Dili Institute of Technology (DIT), Institute of Business (IOB), Institutu Siénsia Relijiaun (ICR), Institutu Superiór Cristal (ISC) no Institutu Formasaun Profesór (ICFP) Baucau.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here