Traballadór Timor-oan iha Austrália ne’ebé hamahon-aan iha Grupu Lolo Liman Ba Fuan Timor (GLLBFT). Imajen/Espesiál.

DILI, 08 maiu 2021 (TATOLI)—Traballadór Timor-oan iha Austrália ne’ebé hamahon-aan iha Grupu Lolo Liman Ba Fuan Timor (GLLBFT), sei fó apoiu etapa daruak nian ho osan $6.160 hodi entrega ba Dioseze Dili.

Apoiu ne’e sei entrega liuhosi Arsebispu Arkidioseze Metroplitana Dili, Don Virgílio da Silva do Carmo, SDB, no tuir planu sei fó apoiu ba vítima inundasaun no ema kbiit laek sira iha Timor-Leste.

Notísia Relevante: Grupu Lolo Liman Fuan Ba Timor entrega $26.600 ba Arsebispu Dili

Reprezentante Grupu Lolo Liman ba Fuan Timor iha Austrália, Nino Caileto, hateten objetivu hosi apoiu ne’e atu bele fó apoiu nesesidade bázika ba família no maluk timor-oan sira hotu ne’ebé mak sai vítima ba dezastre naturál iha domingu (04/04/2021) no ba família kbiit laek ida iha Postu Adminsitrativu Maubisse, Munisípiu Ainaro.

“Ajuda etapa dahuluk nian ba vitima inundasaun sira-ne’ebé mak enfrenta problema boot iha Timor, iha loron 9 fulan-abril 2021 ne’e, ami haruka no entrega ona osan montante hamutuk $26,600 ba amu bispu Dioseze Dili liuhosi Me. Angelita Gomes, Superiór Madre Salesiana Balide. Agora, etapa daruak nian, iha loron 8 maiu 2021, ami haruka osan montante hamutuk $6.160 no nafatin entrega ba Diozese Dili liuhosi Reitór Seminariu Balide, Pe. Angelo Salsinha,’’ Reprezentante Grupu Lolo Liman ba Fuan Timor ne’e informa ba Agência TATOLI liuhosi WhatsApp (WA), sábadu ne’e.

Traballadór Timor-oan iha Austrália ne’ebé hamahon-aan iha Grupu Lolo Liman Ba Fuan Timor (GLLBFT). Imajen/Espesiál.

Grupo Lolo Liman ba Fuan Timor nafatin ajuda maluk timor-oan sira-ne’ebe mak hetan probelma liuliu ba família sira-ne’ebé mak lakon inan-aman, maun-alin, no oan iha tempu inundasaun ne’ebé akontese iha loron 4 fulan abríl fulan kotuk, inklui f’o ajuda mós ba familia kbiit laek sira.

“Ho osan ne’ebé mak natoon, ami koko nafatin ajuda ita-nia maluk sira-ne’ebé mak lakon nia família iha tempu inundasaun. Hanesan, ba família ne’ebé rai taka iha Comoro-Kampug Baru, alin Moruk ne’ebé lakon iha Beduku, tulun ba posko Manatuto, no ami sei tulun mós família kbiit laek ida-ne’ebé mak Rádiu Komunidade Maubisse fó sai iha loron 7 fulan-maiu tinan 2021 iha mídia sosiál (faceebook),” nia dehan.

Traballadór Timor-oan iha Austrália ne’ebé hamahon-aan iha Grupo Lolo Liman ba Fuan Timor ne’e promote, ba oin, sei ajuda tan materiál balun hanesan roupa, kadernu eskola nian no nesesidade báziku sira seluk tan ba vítima sira.

Timor-oan hirak ne’ebé hamahon aan iha Grupo Lolo Liman ba Fuan Timor ne’e, mesak Timor-oan sira-ne’ebé servisu iha Austrália laran tomak mak hanesan iha Queensland, Brisbane, Caboolture, Stanthorpe, Sunshine, Coast, Cairns, Darwin, Perth Albany, Victoria, Melbourne, Mildura, Warrnambool, NSW, Sydney, Griffith, Adelaide, no Tasmania.

Notísia Relevante: Don Virgílio: Traballadór Timoroan iha Austrália tulun vítima dezastre naturál

Jornalista: Felicidade Ximenes

Editór: Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here