Estudante-sira simu rezumu matéria iha eskola. Imajen Tatoli/Egas Cristóvão

DILI, 08 maiu 2021 (TATOLI)–Kordenadór Eskola Ensinu Báziku Filiál (EBF) Aiturilaran, Vidál dos Santos, informa iha eskola refere kria sistema distribuisaun rezumu matéria ba alunu-sira depende ba estudante sira-nia prezensa, maibe estudante barak mak seidauk bele foti rezumu matéria tanba hela do’ok no laiha transporte.

“Estudante barak mak seidauk bele foti rezumu matéria tanba hela dook no transporte laiha. Ita aplika maneira ida-ne’e tanba ita lakohi viola regra protokólu hosi Ministériu Saúde no Organijasaun Munidiál Saúde nian. Ita tenke kumpre distánsia sosiál atu prevene moras COVID-19,” Vidál dos Santos hateten ba Agência Tatoli iha eskola EBF Aiturilaran, dili, sábadu ne’e.

Profesór kada dixiplina ida-idak, nia dehan, halo hotu ona preparasaun ba rezumu materia para atu distribui ba alunus purvolta 970 pesoa iha eskola EBF Aiturilaran, maibé profesór sira la mantein iha eskola, entaun bainhira estudante sira mark prezensa mak foin parte eskola telefone ba profesór sira mak mai halo distribuisaun rezumu matéria ba estudante sira.

Matéria ne’ebé profesór sira distribui ne’e la fó ba estudante sira dala ida de’it maibé estudante sira hetan rezumu materia ida de’it iha prosesu distribuisaun. Bainhira sira prenxe hotu ona iha uma no hafoin lori fila-fali mai hatama mak foti tan matéria sira seluk tán.

“Ita halo ida-ne’e atu ajuda estudante sira bele foku ba matéria ne’ebé sira simu dadaun ne’e, atu labele prejudika sira tanba ita hatene sira la simu matéria ho másimu durante estadu emerjénsia. Tan ne’e, ita labele obriga sira atu rezolve matéria hotu iha loron ida,” nia dehan.

Tuir nia, rezumu matéria ne’ebé mak profesór sira prepera ona tuir dixiplina ne’ebé sira hetan mak lingua Tetun, Portugés, Matemátika, Estudu do Meiu, Edukasaun Sivika, no Relijiaun Moral.  

Jornalista: Tomé Amado

Editór: Cancio Ximenes

HAKEREK NO HATÁN

Please enter your comment!
Please enter your name here