Ekipa Saúde halo atendimentu teste Swab. Imajen Tatoli/dok

DILI, 08 maiu 2021 (TATOLI)—Abitante sira iha Suku Bemori, Postu Administrativu Na’in Feto, Munisípiu Dili, prontu atu kontribui no koopera ho ekipa saúde hosi Pilar III vizilánsia epidemiolojia nian ba prevensaun COVID-19 liuhosi hala’o teste swab masal.

“Ita kontribui no koopera ho programa Governu nian, planu kona-ba testa masal maibé la’ós obrigatóriu. Ita hakarak koopera ho Estadu no Governu atu halo prevensaun maibé la signifika obrigatóriu ba ita-nia sidadaun sira atu halo teste swab no vasina,” Xefe Suku Bemori, Cristalina Perreira Soares de Oliveira, infroma ba Agência Tatoli liuhosi telefónika, sábadu ne’e.

Autoridade lokál ne’e hatutan, maske Governu deside obrigatóriu atu halo teste masal ne’e abitante sira konkorda maibé la konkorda de’it ba liafuan obrigatóriu atu ema hotu-hotu tenke tuir teste, tanba sidadaun ida-idak iha direitu atu hili no hakarak atu simu ka lae.

“Ema balun lakohi ita labele obriga tanba ida-ne’e ema-nia direitu, ita labele viola. Maibé ha’u hanesan autoridade lokál koopera ho Governu no Estadu nafatin hodi kontribui,” nia dehan.

Ba programa teste masal ho vasina AstraZeneca ne’e, nia dehan, durante ne’e nia parte hamutuk ho xefe aldeia sira halo sensibilizasaun ba abitante sira no hein de’it bainhira mak parte pesoál saúde sira halo teste masal iha suku ne’e, tanba komunidade hakarak tuir teste swab no simu vasina.

Xefe suku ne’e hateten, povu hakarak kontribui ba prevensaun COVID-19 ne’e maibé liafuan obrigatóriu ne’e la kondis ho situasaun ne’e tanba npovu Bemori barak mak trauma tanba dehan obrigatóriu ne’e.

Aleinde ne’e, nia informa, iha Suku Bemori hala’o ona vasina dahuluk nian ba xefe aldeia sira inklui ho komunidade balun, maibé faze daruak nian sei hein ekipa relevante atu foti dadus hafoin ne’e mak fó vasina AstraZeneca ba doze daruak nian.

“Ha’u rasik seidauk simu vasina AstraZeneca tanba tensaun. Maibé, teste swab ha’u tuir ona ne’ebé bainhira faze daruak ba vasina ha’u bele simu, karik ha’u-nia tensaun normál ona,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here