Kondisaun estrada ligasaun Aipelu ba Suku Fatumasi, Postu Administrativu Bazartete, Munisípiu Liquiça. Imajen Tatoli/Hortencio Sanchez

LIQUIÇA, 07 maiu 2021 (TATOLI) – Xefe Suku Fatumasi, Postu Administrativu Bazartete, Munisipiu Liquiça, Eduardo Alves da Cruz hateten, uma hamutuk 12 maka hetan estragu hosi dezastre naturál, 04 abríl liubá.

“Foin lalais udan ne’e mak estraga ema nia uma hamutuk 12, iha udan maka’as halo rai nakfera lori halai uma no balun uma laran nakfera hotu,” Xefe Suku Fatumasi, Eduardo Alves da Cruz, hateten ba Agência Tatoli iha Liquiça, sesta ne’e.

Nia parte hato’o ona dadus ba nasionál no Gabinete Primeiru-Ministru nian mak tun direita iha semana kotuk hasai fotografia lori ona ba nasionál.

Nia dehan, bainhira akontese autoridade Munisipál haruka kedan ajudu emerjénsia hanesan foos, supermi, mina no seluk tan ba família uma-kain 12 ne’e no iha loron hira ba kotuk família hirak ne’e mós hetan kedan apoiu hosi lider Karizmátiku Kay Rala Xanana Gusmão hanesan foos no seluk tan.

Kona-ba kondisaun infraestrutura báziku hanesan  eletrisidade maioria komunidade Fatumasi asesu hotu ona no bee-moos agora daudaun maioria komunidade iha area ne’ebá asesu ona tanba antes ne’e hetan ajuda hosi Water Aid no ekipa Programa Dezenvolvimentu Suku (PNDS) hodi dada ona bee-moos ba komunidade sira.

Fatumasi kompostu hosi aldeia haat mak hanesan, Bazartete, Durbasa, Legimea no Metir ho nia populasaun hamutuk 5.000-resin hosi Xefe família 547 no area luan 6,79 kilómetru kuadradu.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here