Diretór Jerál STAE, Acilino Manuel Branco. Imajen/Espesiál.

DILI, 07 2021 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, informa iha trimestre dahuluk (2021) ne’e STAE rejistu eleitór foun iha territóriu Timor-Leste hamutuk 9.868.

“Ita rejistu eleitór foun iha territóriu nasionál hahú hosi fulan-janeiru to’o marsu 2021 ne’e hamutuk 9.868. Hosi total ne’e kompostu hosi mane 4.973 no feto 4.895,” Acilino Manuel Branco hateten ba Agência TATOLI iha nia knaar fatin Caicoli, Dili, sesta ne’e.

Hosi total eleitór foun ne’e, nia informa, hosi Munisípiu Aileu hamutuk 499, Ainaro 805, Baucau 906, Bobonaro 901, Covalima 686, Dili 2.203, Ermera 1.051, Lautém 709, Liquiça 575, Manatuto 338, Manufahi 474, RAEOA 165, no Munisípiu Viqueque hamutuk 575.

Diretór STAE ne’e hatutan, eleitór rejistradu no atualizadu dadus to’o fulan marsu tinan ida-ne’e hamutuk 839.430.

“Ita-nia eleitór ne’ebé rejistu iha nível nasionál iha marsu fulan ikus 839.430. Ida-ne’e atualizadu no rejistradu iha baze dadus no hosi númeru ne’e mane hamutuk 435.537 no feto hamutuk 403.893,” nia relata.

Hosi númeru 839.430 ne’e kompostu hosi Munisípiu Aileu hamutuk 33.038, Ainaro 44.496, Baucau 93.840, Bobonaro 69.467, Covalima 47.856, Dili 184.768, Ermera 82.959, Lautém 46.805, Liquiça 49.514, Manatuto 34.329, Manufahi 39.595, RAEOA 49.493 no Munisípiu Viqueque hamutuk 57.349.

Maske iha pandemia COVID-19 nia laran, maibé atividade STAE ba atendementu eleitorál kontinua la’o nafatin no kumpre nafatin regra ka medida prevensaun hosi Ministériu Saúde (MS) no Organizasaun Mundiál Saúde (OMS), no tuir planu tinan oin ne’e’ STAE sei realiza eleisaun.

“Maske iha situasaun pandemia COVID-9 maibé hakarak ka lakohi eleisaun ne’e tenke realiza iha tinan oin. Tanba ne’e, ita tenke halo preparasaun no haree ba kalendáriu pre-eleitorál mak dadaun ne’e prepara matéria akizasaun ba ekipamentu ne’ebé iha tempu badak sei hahú iha STAE,” nia esplika.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here