Governu transporta apoiu umanitáriu ho elikópteru ba Munisípiu Covalima, tersa (04/05). Imajen média MI/Dok.

DILI, 07 maiu 2021 (TATOLI)-Autoridade-sira Munisípiu Covalima nian la admite atu nia abitante ka sé de’it atu halo viajen ilegál tama area jurisdisaun Covalima nian.

Notísia Relevante : Governu kontinua transporta apoiu umanitáriu ba Covalima

Administradór Munisípiu Covalima, Francisco de Andrade, hateten, bainhira Estadu deside Munisípiu Covalima tama iha serka sanitária, maka autoridade-sira  halo kedas koordenasaun to’o baze atu evita ema halo viajen ilegál hosi munisípiu seluk tama ba Covalima.

“Viajen ilegál mak seguransa ka komunidade kaer toman sei haruka fila no la tama ba Munisípiu Covalima,” Administradór Munisípiu Covalima, Francisco de Andrade informa ba Agência Tatoli liuhosi telefónika, sesta ne’e.

Nia hatutan, abitante-sira ne’ebé atu tama ba Munisípiu Covalima tenke iha karta autorizasaun hosi Sala Situasaun-Sentru Integradu Jestaun Krize (SS-CIGC-sigla portugés).

“Hafoin iha loron ita-nia Governu deside renovasaun SS semana rua Munisípiu sira inklui Munisípiu Covalima mós tama hotu, ami ekipa task force Covalima deside kedas sé de’it atu mai Covalima tenke iha karta hosi SS-CIGC katak livre hosi COVID-19, no sira ne’ebé halo viajen ilegál sei haruka fila-fali maske Covalima oan,” Francisco de Andrade afirma.

Ekipa task force Covalima deside la simu ema viajen ilegál tanba daudaun ne’e hahalok viajen ilegál mak Munisípiu Covalima rejistu fali kazu pozitivu.

“Ami autoriza ema ne’ebé bele tama-sai  Covalima mak hanesan jornalista, Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), ekipa saúde no servisu Administrasaun Munisipál nian mak bele sai halo viajen ba mai iha Munisípiu Covalima,” nia tenik.

Kona-ba atividade movimentu transporte no ema nian iha Munisípiu Covalima kontinua la’o hanesan baibain, maibé nia dehan, aplika nafatin  regra prevensaun COVID-19 hosi  Organizasaun Mundiál Saúde  (OMS) ho Ministériu Saúde, hanesan sai uza máskara, fase-lima ho sabaun ka uza hand sanitizer no distansiamentu sosiál.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here