Komisáriu AA/Alfándega, José António Fátima Abílio. Imajen TATOLI/Egas Cristóvão

DILI, 07 maiu 2021 (TATOLI)–Autoridade Aduaneira (AA)/Alfándega kontinua serbisu durante implementasaun Serka Sanitária no konfinamentu domisiliáriu jerál ligadu ho surtu COVID-19 iha Timor-Leste.

“Durante Serka Sanitária, Autoridade Aduaneira hola parte mós iha liña frente ne’ebé mak tenke halo atendimentu ba servisu esensiál maibé nafatin kumpre protokolu saúde”, Diretór Jerál AA/Alfándega, José António Fátima Abílio, relata ba Agência TATOLI iha niniaa knaar fatin, Palásiu Governu, sesta ne’e.

Tuir Diretór Jerál, pesoál efetivu ne’ebé servisu hamutuk 192 inklui ona ho destaku iha fronteira terrestre sira.

“Pesoál efetivu sira ne’e ba atendimentu servisu esensiál sira, ami tenke servisu nafatin tanba ami mós hola parte iha liña frente. Iha edifísiu sentrál menus, barak liu mak destaka iha portu maibé sira fahe balun tama balun deskansa, halo rotasaun ba malu,” nia akresenta.

Aleinde ne’e, atividade iha Portu Dili kontinua la’o maski volume importasaun menus.

“Servisu Alfándega nian importante tebes tanba iha situasaun sira hanesan ne’e sasán importasaun tama maski menus, maibé sasan ne’ebé tama maioria nesesidade bázika,” nia hatutan.

Durante hala’o knaar, AA hasoru difikuldade limitasaun fasilidade hanesan hand sanitazer ne’ebé dala ruma laiha.

“Durante ne’e empreza balun mak apoia hodi funsionáriu sira uza ba hala’o knaar iha terrenu,” nia tenik.

Jornalista: Antónia Gusmão

Editora: Jula Chatarina

PUBLISIDADEiklan

HAKEREK NO HATÁN

Please enter your comment!
Please enter your name here