Logo Ministériu Saúde.

DILI, 07 maiu 2021 (TATOLI)—Ministériu Saúde (MS), ezekuta ona Orsamentu Jerál Estadu (OJE) 2021, hamutuk millaun $12.8, hosi montante millaun $56.

Diretór Nasionál Orsamentu no Jestaun  Finansa, Miguel Maria, hateten ezekusaun hosi millaun $12.8 ne’e, ba saláriu no vensimentu millaun $6.9, bens no serbisu millaun $1.4, transferénsia públika millaun $4.5, kapitál menór ho kapitál dezenvolvimentu sei iha faze komitmentu.

Notísia relevante:Ezekusaun OJE 2021 atinje 23,8%

“Orsamentu ne’ebé prevee ba MS, loloos ne’e millaun $58. Maibé, desizaun Konsellu Ministru katak, kada Minsitériu tenki kontribui 7% ba programa Cesta bázika. Entaun, sirkulár ne’e sai, MS kontribui hosi kapitál dezenvolvimentu millaun $1.8, hela millaun $57. Nune’e mós iha Orsamentu Retifikativu MS hasai tan millaun $1 hosi kapitál desenvolvimentu, hela de’it millaun $56,’’ Miguel Maria, hateten ba Tatoli iha nia kna’ar fatin, sesta ne’e.

Tanba ne’e, to’o ohin MS ezekuta ona trimestre dahuluk millaun $12.8 hosi millaun $56, faze obrigasaun hamutuk  millaun $1 no faze komitmentu hamutuk millaun $8, agora daudaun balansu sei iha millaun $30.

“Balansu ida-ne’e, foin mak iha inísiu fulan maiu no serbisu balun ladún la’o di’ak, tanba limitasaun movimentu ita-nia ema sira atu ba terenu,’’ nia dehan.

Oras-ne’e daudaun mós, pagamentu lubuk ida MS seidauk bele halo, hanesan konstrusaun no reabilitasaun, tanba tenki hetan verifikasaun hosi ADN no ekipa enjeñeiru mós labele halo movimentu iha periúdu serka sanitária.

Maski nune’e, MS kontinua esforsu atu bele implementa orsamentu iha kategoria lima no MS-rasik oras-ne’e daudaun, foku-liu ba prevensaun COVID-19, nune’e, bainhira ultrapasa situasaun ne’e atividade hotu bele funsiona.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here