Peste Lakataru Makerek ne’ebé ataka batar. Imajen/MDF

DILI, 07 maiu 2021 (TATOLI)—Embaixada Austrália iha Timor-Leste liuhosi Market Development Facility (MDF) komprometidu tulun Ministériu Agrikultura no Peska (MAP) halo prevensaun ba peste Lakataru Makerek (Fall Armyworm) ne’ebé ataka batar no peste Suína Afrikana (African Swine Fever) ba fahi.

Embaixadór Austrália iha Timor-Leste, Peter Robert, hateten, peste rua ne’e afeta maka’as liu ba seguransa ai-han no ameasa ba agrikultór kiik sira-nia moris, tanba estraga produtu agrikultura, tanba ne’e presiza halo prevensaun.

“Austrália liuhosi Market Development Facility kontente tanba liuhosi lansamentu kampaña sensibilizasaun nasionál ba prevensaun sei uza mídia nasionál, SMS no rede sosiál, atu hasa’e koñesimentu ba prevensaun, nune’e bele ajuda agrikultór sira bele identifika estragu hosi peste sira,” Embaixadór Peter Robert, dehan ba Agência TATOLI, iha salaun MAP, Comoro, sesta ne’e.

Notísia relevante: MAP-MDF lansa kampaña sensibilizasaun nasionál ba prevensaun peste

Diplomata ne’e dehan, Timor-Leste hasoru ona dezafiu COVID-19 no dezastre naturál, ne’ebé fó impaktu maka’as ba komunidade, tanba ne’e presiza evita ameasa ba agrikultór sira molok sai boot liután.

Liuhosi kooperasaun, MDF no MAP sei halo kampaña hodi ajuda agrikultór sira prevene peste ne’ebé ataka batar no fahi.

“Ami kolabora halo kooperasaun importante ida ne’e, ne’ebé peste ne’e labele espalla barak liután no proteje agrikultór sira-nia moris,” nia akresenta.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here