Bee kontinua hoban uma komunidade iha Aldeia Moris Foun, Tasi-tolu impaktu hosi inundasaun iha 04 abríl. Imajen Tatoli/Eugénio Pereira.

DILI, 07 maiu 2021 (TATOLI)—Sekretária Estadu Protesaun Sivíl (SEPS), fó autorizasaun ba autoridade lokál-sira atu bele sertifika liu hosi komprova família afetadu ne’ebé laiha kartaun eleitorál, hodi bele asesu ba apoiu ne’ebé Governu prepara.

SEPS, Joaquim Gusmão esplika, autoridade lokál-sira bele fasilita hodi halo deklarasaun katak, abitante ne’e hela duni iha suku ne’e ho aprovasaun hosi autoridade másima suku.

Notísia relevante:Entidade 47 fó ona apoiu umanitáriu liu hosi SEPS

“Família ne’ebé laiha kartaun eleitorál, xefe suku no xefe aldeia mak hatene hodi identifika loloos katak, sidadaun ne’e pertense duni ba suku ne’e. Tanba ne’e, bainhira sertifika ona ita sei fó apoiu,’’ Joaquim Gusmão hateten ba jornalista Agéncia Tatoli iha edifísiu SEPS, Caicoli, sesta ne’e.

Governante ne’e dehan, apoiu ne’e sei  fó bazeia ba dadus, tanba ne’e família ne’ebé seida’uk  simu apoiu, bele komunika ho autoridade lokál hodi halo reklamasaun.

Antes ne’e, Xefe bairru Besi-tua no ekipa João Paulo II, Agostinho Gomes, informa iha inísiu nia parte halibur eleitorál lubuk-ida hosi komunidade no hetan ona apoiu hosi Governu.

Maski nune’e,  família 68 ne’ebé hela iha Masin-lidun, Tasi-tolu no evakua ba bairru Besi-Tua, João II, seidauk hetan apoiu nesesidade bázika, razaun laiha kartaun eleitorál tanba la salva dokumenetu hotu durante inundasaun iha 04 abríl.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here