Komunidade Soibada haku’ur mota Bua-Rahun, Soibada, Manatuto. Imajen Tatoli/Eugénio Pereira

DILI, 06 maiu 2021 (TATOLI)-Xefe Suku Lacu Mesak, Postu Administrativu Laclo, Munisípiu Manatuto, Filomeno Rodrigues Pereira Cárceres, informa hafoin akontesimentu dezastre naturál iha loron 04 abríl liubá, to’o agora, uma-kain 150 iha suku tolu, Postu Administrativu Laclo  seidauk bele asesu ba liña eletrisidade.

Notísia Relevante : Xefe Suku Lacu-Mesak husu Governu normaliza Mota Laclo

“Ita-nia komunidade uma-kain 150 ne’ebé seidauk asesu ba eletrisidade mak hanesan, Suku Lacu-Mesak, Uma Naruc no Iliheu, dezde akontese dezastre naturál to’o mai agora seidauk bele asesu ba eletrisidade tanba fiu no ai-riin eletrisidade hetan estragu total,” Filomeno Rodrigues Pereira Cárceres informa ba Agência Tatoli liuhosi telefónika, kinta ne’e.

Nia hatutan, suku tolu ne’ebé seidauk asesu ba eletrisidade tanba kauza hosi ai-riin eletrisidade no fiu monu hahú hosi área Condar, Suku Uma-Caduak nian to’o mai Suku Laco-Mesak ai-rin eletrisidade sanulu mak monu lakon kedas momentu inundasaun.

Hosi Suku Laco-Mesak ba to’o área Kilaun, Suku Uma-Naruc nian no ba tama to’o área Labubo, Suku Lacu-Mesak nian ai-riin eletrisidade sura hamutuk 15 mak monu hotu no fiu eletrisidade nian balu mós monu rai halai lori lakon ka hakoi tiha balun.

Nia dehan, hosi akontesimentu ne’e sira-nia parte hato’o to’o ona pedidu ba parte relevante no Eletrisidade Timor-Leste(EDTL) rasik mós ba haree ona, maibé to’o agora seidauk iha atendimentu urjente ruma atu normaliza fali liña eletrisidade sira.

Kona-ba infraestrutura públiku sira hanesan estrada ligasaun Laclo Vila ba Postu Administrativu Remexio, Munisípiu Aileu liuliu ba Suku Hoho-Rai nian estragu kedas iha Parte Aldeia Rea-Dodok, Suku Lacu-Mesac nian no iha área Batik Luli ninian, ameasa kotu, nune’e mós hosi área Suku Uma-Naruc nian, Parte Kilaun nian nakonu ho tahu, estrada ameasa atu kotu.

“Ponte ki’ik tolu Askeo Malorok nian ne’ebé mak konstrui kompañia lokál balu iha tinan 2013 no finaliza iha tinan 2016, ita-nia komunidade uza agora hetan estraga totál, nia tenik.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here