Diretór Ezekutivu SERVE, Florêncio Sanches. Imajen TATOLI/Jogerjo Guterres

DILI, 06 maiu 2021 (TATOLI)–Servisu Rejistrasaun no Verifikasaun Emprezariál (SERVE) simu pedidu empreza nasionál balun ne’ebé hakarak reativa hikas atividade ekonómika, maski iha situasaun ne’ebé atividade balun kuaze paralizadu.

“Foin daudaun ha’u simu tan pedidu hosi empreza nasionál ualu maka konsege reativa sira-nia aktividade ekonómika iha situasaun Serka Sanitária. Ida-ne’e parte SERVE tenke louva maski situsaun hanesan ne’e maibé ita-nia empreza nasionál sira iha vontade nafatin atu halo sira-nia aktividade negósiu,” Diretór Ezekutivu SERVE, Florêncio Sanches, informa ba Agência TATOLI, iha ninia knaar fatin, Palm Bussiness, Hudi-laran, kinta ne’e.

Enkuantu, iha fulan-abríl tinan ne’e nia laran, iha ámbitu implementasaun Estadu Emerjénsia no Serka Sanitária, iha empreza balun maka deside taka tanba menus rendimentu.

“Empreza ne’ebé taka iha fulan kotuk (abríl) hamutuk 17 no hosi númeru ne’e maioria ema estranjeiru. Sira deside taka tanba impaktu situasaun COVID-19 no menus rendimentu, ne’ebé labele selu traballadór,” Diretór ne’e akresenta.

Antes ne’e, Iha agostu to’o setembru 2020, SERVE rejista empreza 200-resin maka taka kompañia no atividade negósiu.

Enkuantu, durante janeiru to’o fevereiru 2021, rejista kompañia foun hamutuk 1.660, ho razaun empreza atu asesu ba Seguransa Sosiál no finansiamentu atividade ekonómika hosi banku inklui programa rekuperasaun ekonómika.

Iha sorin seluk, to’o oras ne’e Institutu Nasionál Seguransa Sosiál (INSS) rejista ona empreza privadu hamutuk 5.000.

Iha orsamentu 2021, Governu prevee millaun $123,9 ba pakote rekuperasaun ekonómika ho objetivu atu hasa’e empregu, investe iha kapitál sosiál, no promove setór produtivu hodi kontribui ba kreximentu ekonómika.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here