Membru PNTL hala’o patrullamentu hodi asegura situasaun serka sanitária iha Dili, sesta (12/03/21). Imajen Tatoli/António Gonçalves.

DILI, 06 maiu 2021 (TATOLI)—Polísia Nasionál Timor-Leste (PNTL), prepara ona ekipa hodi koordena ho Sala Situasaun Sentru Integradu Jestaun Krize (SIJK), atu asegura ekipa Ministériu Saúde (MS) pilar III, ne’ebé sei halo teste swab obrigatóriu ba abitante iha Dili.

“PNTL prepara ona atu ajuda MS hodi halo teste swab masal ba ita-nia komunidade iha Dili tuir rezolusaun Governu ne’ebé fó-sai ona,” Portavóz Komandu Jerál PNTL, Superintendente Xefe, Arnaldo de Araújo hateten ba jornalista-sira, liu hosi konferénsia imprensa iha Caicoli, kinta ne’e.

Notísia relevante:EE da-XIII: sidadaun hotu iha territóriu nasionál obrigatóriu teste swab

Tuir planu, PNTL liu hosi unidade hotu-hotu ne’ebé destakadu iha SIJK, sei hala’o serbisu hodi ajuda ekipa saúde atu halo teste swab tuir oráriu ne’ebé sei fó-sai hosi MS.

Komandu PNTL apela ba abitante iha kapitál Dili, atu kumpre regra Serka Sanitária, hodi submete ba teste swab.

Entretantu, Governu liu hosi reuniaun Konsellu Ministru (KM) iha kuarta 05 maiu 2021, aprova ona projetu Dekretu Governu ba alterasaun dahuluk ba Dekretu Governu númeru 14/2021 loron 29 abríl, kona-bá medida ezekusaun deklarasaun Estadu emerjénsia, ne’ebé efetua hosi Dekretu Prezidente Repúblika númeru 24/2021, loron 28 abríl.

Ho alterasaun ida-ne’e individu hotu-hotu iha territóriu nasionál ne’ebé abranje hosi operasaun-sira testájen masal ka aleatória, tuir kritériu-sira ne’ebé define hosi autoridade saúde, obrigadu atu realiza ezame médiku ba diagnóstiku COVID-19, ka infesaun hosi SARS-CoV-2.

Dekretu Governu ne’e mós mensiona katak, abitante ne’ebé rekuza hodi realiza ezame médiku hosi diagnóstika obrigatóriu, sein prejuizu responsabilidade kriminál, sujeita ba izolamentu profilátiku obrigatóriu, iha estabelesimentu saúde, rezidénsia ka iha sentru izolamentu ne’ebé estabelese ba efeitu hosi Estadu.

Iha kazu ida-ne’e, despeza ne’ebé iha relasaun ho izolamentu profilátiku-nian, individu rasik maka selu.

Alende ne’e, sita mós kona-bá, sidadaun hotu-hotu nasionál ka estranjeiru ne’ebé hakarak tama iha territóriu nasionál, tenke hala’o uluk pedidu autorizasaun prévia.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here