DILI, 06 maiu 2021 (TATOLI)—Primeiru-Ministru (PM), Taur Matan Ruak, hamutuk ho korpu seguransa no ekipa apoiu viajen, iha kuarta ne’e, iha ninia rezidénsia ofisiál iha Farol, halo swab test ba COVID-19.
“Teste ne’e ba ita hotu nia di’ak, tanba ne’e ita tenke koopera. Ha’u halo teste swab ne’e dala haat ona, aban atu ba Balibo sira dehan Primeiru-Ministru atu ba kondisaun tenke swab, ha’u dehan, ha’u prontu atu swab,” PM Taur dehan liuhosi nota ne’ebé Agência TATOLI asesu, kinta ne’e.
Xefe Governu ho komitiva sei halo viajen ba postu administrativu Balibo, munisípiu Bobonaro, hodi inaugura postu Polísia Nasionál Timor-Leste (PNTL), Unidade Patrullamentu Fronteira (UPF) ne’ebé lokaliza iha Wefauk, iha sesta (07/05).
Konstrusaun postu UPF iha fronteira terrestre hetan apoiu hosi Governu Austrália no servisu hamutuk ho Governu Timor-Leste.
Notísia relevante: Aban, PM Taur-Komisáriu Faustino inaugura postu UPF Eufauk
Xefe Governu konsidera, presiza sakrifísiu oituan kuandu lakohi hetan moras.
“Tanba sá mak sidadaun sira lakoi koopera ne’e ba ita-nia moris, sei ita hakarak moris tenke sakrifísiu, ne’ebé ha’u husu inan-aman sira, Governu la’ós bulak atu halo a’at ba ita-nia sidadaun sira, buat ne’e di’ak no lakoi sidadaun sira mate,” nia akresenta.
Tuir PM, teste ne’e di’ak tanba ne’e sidadaun hotu tenke koopera, tanba saúde ema ida-idak nian.
Nune’e, rezultadu teste rápidu COVID-19 hosi PM no ekipa sira ho rezultadu negativu.
Iha ámbitu impozisaun serka sanitária iha munisípiu Dili, autoriza sidadaun dezloka ba munisípiu ho razaun fundamentál no aprezenta teste negativu COVID-19 inklui karta autorizasaun hosi Sala Situasaun-Sentru Integradu Jestaun Krize (SS-CIGC, sigla portugés).
Jornalista: Antónia Gusmão
Editora: Julia Chatarina