Embaixadora Malázia, Sarimah Akbar, hasoru malu ho Prezidente Repúblika Francisco Guterres Lú Olo. Imajen/Mídia PR.

DILI, 06 maiu 2021 (TATOLI)—Embaixadora Malázia, Sarimah Akbar, ohin, hasoru malu ho Prezidente Repúblika Francisco Guterres Lú Olo, hodi hato’o despedida tanba ninia mandatu ramata iha Timor-Leste.

Iha sorumutu ne’e, Embaixadora Sarimah Akbar ko’alia ho Prezidente Repúblika kona-ba relasaun diplomásia entre rai rua ne’ebé Malázia afirma ninia pozisaun hodi kontinua apoiu Timor-Leste atu tama ba membru ASEAN.

“Ohin, ha’u mai hato’o despedida tanba ha’u-nia mandatu hanesan Embaixadora Malázia iha Timor-Leste ba semana tolu iha fulan maiu nia-laran ne’e ramata. Iha sorumutu ne’e, ha’u afirma liután katak relasaun diplomasia entre nasaun rua iha ne’e importante, tan ne’e mak ami (Malázia) mós kontinua apoiu Timor-Leste atu tama ba membru ASEAN,” Embaixadora Malázia ne’e hateten ba jornalista sira, iha Palásiu Prezidensiál Nicolau Lobato, Bairru Pite, Dili, kinta ne’e.

Maske mandatu ramata, Sarimah Akbar espera katak nasaun rua (Timor-Leste no Malázia) nafatin iha relasaun di’ak no Timor-Leste mós iha dezenvolvimentu ne’ebé di’ak liután.

Embaixadora Malázia, Sarimah Akbar, hasoru malu ho Prezidente Repúblika Francisco Guterres Lú Olo. Imajen/Mídia PR.

Durante ne’e Malázia ho Timor-Leste hala’o kooperasaun iha área rekursu umanu hodi fó kapasitasaun ba funsionáriu sira iha Timor-Leste no ba membru parlamentu foinsa’e sira, tanba iha futuru ne’e rekursu umanu importante tebes.

Iha biban ne’e, Embaixadora ne’e mós agradese ba Prezidente Repúblika ba oportunidade hala’o knar iha Timor-Leste no nia parte bele simu vasina AstraZeneca, no iha Malázia ne’ebá mós fó oportunidade ba Embaixadora Timor-Leste iha Malázia ne’ebé hetan mós vasina AstraZeneca.

“Ho asaun ne’e, ami onradu tebes,” Sarimah Akbar hateten.

Iha enkontru ne’e, Prezidente Repúblika, Francisco Guterres Lú Olo, hato’o agradese ba servisu Embaixadora Malázia nian durante ne’e iha Timor-Leste, tanba Malázia ho Timor-Leste iha relasaun di’ak bainhira Timor-Leste hetan ona independénsia.

Prezidente Repúblika mós konsidera apoiu ne’ebé mak durante ne’e Malázia oferese ba Timor-Leste iha área rekursu umanu no krize ne’ebé Timor-Leste hasoru, hahú hosi Timor-Leste hamriik nu’udar nasaun independénsia iha 1999 liub’a ne’e.

“Ba oin nasaun rua sei iha relasaun metin no di’ak liután. Bainhira surtu COVID-19 ne’e ramata, sei servisu hamutuk di’ak liután ba programa importante sira tuir mai tan,” Xefe Estadu ne’e hateten.

Notísia Relevante: PPN-Embaixadora Malázia diskute kooperasaun iha área rekursu umanu

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here