Produsaun hakiak manu atu fó tolun iha Indonézia. Imajen/Google

LIQUIÇA, 06 maiu 2021 (TATOLI) – Diretór kompañia Meti Mesak, Afonso Brites Serão hateten, oras ne’e nia kompañia enfrenta difikuldade no krize finanseiru tanba rendimentu hosi sira-nia produtu menus loos.

“Ami nia atividade agora la’o, maibé obriga an de’it, primeiru nia rendimentu laiha, maibé ami nia grupu sei la para tanba para agora ita atu moris oinsá,” Afonso Brites Serão informa ba Agência Tatoli iha Loes, kinta ne’e.

Nia dehan, atividade Meti Mesak halo mak hakiak manu hodi koleta manu-tolun hodi haruka ba fa’an iha Dili.

“Agora arraska loos. Besik tinan ida ona, ami labele hatama manu hosi Malázia, agora situasaun hanesan ne’e labele hatama, agora manu la tama, manu nia hahán mós labele haruka mai entaun manu-tolun mós menus, maibé ida ne’e konsekuénsia no ami aguenta deit ona,”  nia hateten.

Bainhira seidauk mosu pandemia Covid-19 semana ida sira sempre hatama manu-tolun ba supermerkadu sira iha Dili semana ida dala tolu. Mas ho serka sanitária no konfinamentu domisiliáriu obrigatóriu ne’e halo atividade paradu no prejudika rendimentu kompañia nian.

“Ami nia kampaña ne’e fó servisu ba traballadór na’in ualu, na’in rua tenke para ona horiseik, agora atu para tan na’in rua, se atu servisu tan rendimentu laiha ita atu lori saida mak selu malu. Ha’u rasik mak haruka sira para tanba ami laiha loos ona rendimentu. Bainhira manu no manu nia hahán tama fali mak bolu sira mai servisu fali. Sira iha ne’e saláriu ha’u fó hahú hosi $115 ba to’o $150 kada ema,” nia hateten.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here