Prezidente ANPM, Florentino Mateus Soares Ferreira. Imajen TATOLI/Egas Cristóvão

DILI, 06 maiu 2021 (TATOLI)--Prezidente Autoridade Nasionál Petróleu no Minerál (ANPM), Florentino Mateus Soares Ferreira, hateten, Projetu-Lei Kódigu Mineiru hanesan enkuadramentu legál atu promove investimentu iha Timor-Leste.

“Ita-nia Kódigu Mineiru hanesan enkuadramentu legál atubele hatuur hodi halo jestaun di’ak ba atividade mineira no promove investimentu hodi fó oportunidade serbisu ba timor-oan sira no kontribui ba reseita Estadu,” Prezidente ANPM hateten hafoin halo audénsia ho Komisaun D (Ekonomia) no C (Finansa Públika) ba Proposta-Lei Kódigu Mineiru iha faze espesialidade, iha sala plenária Parlamentu Nasionál (PN), kinta ne’e.

Antes ne’e, iha loron 30 jullu 2020, PN aprova ona Projetu-Lei Kódigu Minieru iha faze jeneralidade ho votu a-favór 54, kontra 0 no abstensaun 0.

Notísia relevante: PN aprova projetu-lei kódigu mineiru iha faze jeneralidade

Projetu-Lei Kódigu Mineiru hamutuk artigu 162 ho kapítulu 20 no anexu 3, ne’ebé artigu ida define aprovasaun Kódigu Mineiru, artigu rua define polítika mineira, artigu tolu define objetivu sira koba-ba estratéjia setór mineiru nian no ikus liu artigu 162 define dispozisaun tranzitória.

Iha ámbitu audiénsia konjunta ne’e, Deputadu sira hatudu apresiasaun, vontade no kompromisu atu finaliza diskusaun iha espesialidade, nune’e bele kontinua ba diskusaun finál globál no aprovasaun, hafoin Prezidente Repúblika promulga.

“Bainhira lei ne’e entra ein-vigór, bele fó esperansa foun mai ita hodi dezenvolve rekursu minerál tanba durante ne’e dependénsia maka’as ba petróleu,” nia akresenta.

Tuir Prezidente ANPM, iha Kódigu Mineiru prevee atu kria mós  fundu mineiru hanesan mós fundu petrolíferu, ne’ebé hatudu alternativa foun ba Estadu no ba povu Timor-Leste.

Notísia relevante: MPM pleneia kria lei fundu mineiru

“Ita-nia lejizlasaun ne’e iha rekezitu ida atu hatuur fundu mineiru, nune’e aban bainrua reseita tomak ne’ebé ita foti hosi taxa no tarifa sira diretamente tama ba fundu mineiru,” nia esklarese.

Governu mós hanoin atu kria tan empreza estatál mineiru hanesan Timor Gás no Petróleu, Empreza Públika (Timor GAP, E.P) hodi haree ba atividade minerál.

“Fundu mineiru sei sai projetu-lei ida ba Parlmentu Nasionál atubele hatuur no adota mekanizmu no prosedimentu tomak ne’ebé atualmente ita aplika ba fundu no atu hasai osan fundu meneiru tenke liuhosi aprovasaun Parlamentu Nasionál,” nia hatutan.

ANPM konsidera Kódigu Mineiru hanesan lei inan ne’ebé aban bainrua sei hamosu lei lei ki’ik-oan sira, atubele regula no administra di’ak liután atividade minerál, metáliku besi, osan-mean no magánez, naun metáliku fatuk, mármeru no seluk tan inklui regula atividade atrazenatu sira.

“Ita-nia lejislasaun ne’e importante tebes, tanba ita labele tama halo estrasaun arbiru tanba bele iha impaktu ambientál no sosiál ne’ebé mak boot se ita laiha lei sira ne’ebé bele regula,” nia esplika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here