Atividade iha kampu petrolífera, Bayu-undan. Imajen/Espesiál

DILI, 06 maiu 2021 (TATOLI)-Empreza petrolífera australiana, Santos Limited halo ona koordenasaun ho Autoridade Nasionál Petróleu no Minerál (ANPM), atu halo mobilizasaun materiál ba tasi laran iha fulan ne’e.

Prezidente ANPM, Florentino Soares Ferreira, hateten preparasaun perfurasaun la’o di’ak tebes no iha semana ne’e nia laran halo ona aprovasaun lubuk ida, liuliu ba asuntu operasaun hodi autoriza empreza Santos halo mobilizasaun.

“Ita planu atu halo mobilizasaun ba materiál perfurasaun hodi lori ba tasi laran, iha área ne’ebé ita sei halo prefurrasaun.  Dentru fulan ida ne’e mobilizasaun tenke akontese, bele semana ida ne’e ou semana oin,” Prezidente ANPM hateten iha Parlamentu Nasionál, kinta ne’e.

Nia dehan, daudaun hein de’it aprovasaun ikus hosi ANPM ne’ebé pendente, liuliu operasaun iha tasi Timór.

“Ita espera katak preparasaun tomak atu instala materiál perfurasaun bele akontese iha tempu badak, nune’e iha juñu nia laran tuir tempu ita bele halo ona perfurasaun ba posu dahuluk hosi posu tolu ne’ebé planu hela,” nia akresenta.

Tuir Responsável ne’e, planu perfurasaun la’o duni tuir nia dalan, liuliu aprovasaun lori materiál ba iha tasi Timór tanba iha kolaborasaun ho parte Alfándega no entidade Estadu nia ligadu ho transportasaun ró sira.

Empreza Santos iha kompromisu atu halo investimentu ho montante millaun $235 ba projetu perfurasaun mina-matan tolu iha Bayu-undan.

ANPM mós garante perfurasaun posu tolu ne’e sei fó benefísiu ekonómiku ba Timor-Leste no otimizta rekuperasaun kampu Bayu-undan nia vida ba tinan ida tan, tanba antes ne’e tuir informasaun atu desmantela.

Kampu petrolífera nia produsaun menus ona dezde 2015 to’o 2021,  tanba kuaze tinan 27 halo produsaun, entaun produsaun ba rekursu la renovável sa’e tiha no agora iha faze redusaun ona.

“Ita halo tentativa otimiza hasa’e produsaun ou koko atu haree mina rezervatóriu ne’ebé mak iha,” nia hatutan.

Nune’e mós, sei benefisia ba tékniku timor-oan hamutuk 30-resin no empreza sei kontrata servisu laundry no hahan hamutuk 200.

“Ita haree katak halo perfurasaun no produsaun bele hetan orsamentu purvolta millaun $100-resin,” nia tenik.

Produsaun mina komesa tun maka’as tanba kada loron perfurasaun iha Bayu-udan tun hosi barríl 20.000 no agora barríl 18.000, enkuantu gás millaun 500 kúbiku/loron.

“Kuandu perfurasaun ne’e hotu, ita bele prodús ba tan tinan ida, ne’ebé depende ba rezultadu ita bele prodús liu tinan ida, hafoin ita bele tama iha faze dezmantela,” nia katak.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here