Transportasaun mákina pezadu hosi Dili-Suai ho karga hamutuk 38, ba preparasaun perfurasaun mina-matan iha Kosta Sul. Imajen/Timor Resources

DILI, 06 maiu 2021 (TATOLI)–Autoridade Nasionál Petróleu no Minerál (ANPM) finaliza ona avaliasaun no estudu tékniku atu atribui lisensa abientál ba empreza Timor Resources Pty.Ltd atu halo preparasaun ba instalasaun mákina drilling rig atubele halo perfurasaun ba mina-matan iha Kosta Súl.

Prezidente ANPM, Florentino Mateus Soares Ferreira, hateten, daudaun ne’e empreza australiana ne’e mobiliza ona mákina sira no hahú preparasaun ba instalasaun mákina perfurasaun dahuluk iha rai maran.

“Ami prevee atu fó linsensa ambientál iha tempu badak bazeia ba avaliasaun tomak ne’ebé mak ami halo ona hanesan autoridade reguladór no hanesan autoridade ambientál, liuhosi diskusaun ho komisaun evaluadór tomak ne’ebé tama ekipa estudu ba impkatu ambientál,” Prezidente ANPM hateten iha Parlamentu Nasionál, kinta ne’e.

Tuir Resposável ne’e, autoridade prioritiza planu Timor Resources atu halo perfurasaun, maibé difikuldade no dezafiu ne’ebé enfrenta mak estudu ba impkatu ambientál tanba foin ba dahuluk ANPM fó lisensa ambientál ho kategoria A,  atividade perfurasaun mina dahuluk iha rai leten.

“Durante tinan 50 nia laran, ita laiha atividade onshore (iha rai leten) iha Timor-Leste, maski uluk iha tinan 1971 no 1972 iha ona perfurasaun, maibé iha tempu  okupasaun Indonézia, Timor-Leste laiha perfurasaun, agora hanesan atividade dahuluk, tanba ne’e ita tenke halo preparasaun  adekuadu no di’ak atubele garante katak perfurasaun ne’e labele fó impkatu ba ambiente no ita-nia ema,” nia tenik.

Prezidente ANPM dehan, atividade perfurasaun iha onshore iha risku boot, tanba ne’e autoridade iha esperansa bele la’o ho di’ak.

Tuir planu, Timor Resources sei halo perfurasaun ba posu dahuluk iha área Karau iha munisípiu Covalima no Manufahi iha inisíu jullu tinan ne’e.

Iha tinan 2017, hahú halo peskiza jeolójiku no estudu iha bloku lima no iha outubru 2018 hala’o ona teste sízmiku iha bloku A, enkuantu iha bloku C iha zona Betano (entre Alas ho Hatudu) ho teste vibroseis.

Nune’e,  iha bloku A ne’ebé ida-idak hosi perfurasaun tolu iha shallow-field to’o metru 2.000 ho ninia kalkulasaun kustu bele to’o milaun $35.

Enkuantu, bloku B haruka ona ba Timor Gás no Petróleu, Empreza Públika (Timor GAP, E.P) iha Onshore Block, ne’eb’e hanesan subsidiáriu hosi parte Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here