Pesoál-sira hosi Diresaun Nasionál Ambulánsia distribui ambulánsia foun ba Munisípiu. Imajen Tatoli/Felicidade Ximenes.

DILI, 06 maiu 2021 (TATOLI)— Ministériu Saúde (MS) liu hosi Vise Koordenadora Jerál Komisaun Nasionál Prevensaun COVID-19, Odete da Silva Viegas, hateten ekipa saúde halo ona avaliasaun atu transporta pasiente pozitivu COVID-19 ne’ebé ho kazu lizeiru hanesan asintomátiku, ho bus no mini-bus.

“Ita sei uza transporte baibain tanba ho ambulánsia ita haree katak, bainhira tama iha komunidade-nia leet, dala barak halo ema trauma no komunidade mós lamenta,’’ Odete da Silva Viegas, hateten ba jornalista-sira iha otél Novo Turizmu, kinta ne’e.

Notísia relevante:PNTL investiga hela ema tuda rahun ambulánsia iha Afaloicai

Tanba ne’e, abulánsia sei uza de’it hodi tula pasiente-sira ne’ebé iha síntoma hanesan isin-manas, mear ka kazu grave no moderdu, ne’ebé detetadu iha HNGV no transfere mai iha Vera Cruz.

Maski la temi númeru bus no mini-bus ne’ebé MS prepara hodi transporta pasiente lizeiru, maibé Odete deklara katak, sei muda duni mekanizmu transportasaun ne’e.

MS iha difikuldade ba transportasaun

Parte Ministériu Saúde mós rekoñese katak, ekipa saúde enfrenta duni difikuldade ba transportasaun pasiente pozitivu, ne’ebé loron ida númeru kuaze 100-resin, mai hosi Dili no munisípiu-sira.

“Númeru ne’ebé boot, difikulta duni ita atu foti ema na’in 100-resin iha loron ida. Maibé, informasaun ne’ebé populasaun fó liu liu kazu pozitivu-sira, ami rejsita no buka nafatin solusaun. Iha balun ne’ebé ami seidauk foti, ne’e ami rekoñese duni,’’ Odete rekoñese.

Nia dehan, iha inísiu, númeru COVID-19 mosu ladún barak, ekipa saúde fásil atu organiza iha terrenu hodi foti, maibé iha fulan hirak ikus ne’e, kazu pozitivu aumenta makaas to’o 100-resin iha loron ida, signifika movimentu hosi serbisu ambulánsia liu-liu pilár VII hetan duni difikuldade.

Ho situasaun ne’e, hahú horisehik no ohin, MS komesa organiza ona atu iha ekipa ida ne’ebé haree  diretamente oinsá foti kazu-sira ne’e.

Tanba ne’e, entre pilár II ne’ebé tenki hato’o komunikasaun ba ema no mós pilar III, V, VII uza mekanizmu infomasaun kona-bá kazu pozitivu, liu-liu presija informadu kona-bá diresaun hosi pasiente, naran, númeru kontaktu, ekipa haat ne’e tenke hetan.

Alende ne’e, durante ne’e MS mós enfreta difikludade iha komunikasaun entre pilar II, III, V no VII, tanba dalaruma balun telephone dezligadu, no rajaun seluk tan, maibé MS hadi’a ona situasaun ne’e.

Jornalista: Felicidade Ximenes

Editor: Cipriano Colo

HAKEREK NO HATÁN

Please enter your comment!
Please enter your name here