Logotipu CAC.

DILI, 06 maiu 2021 (TATOLI)—Komisaun Anti-Korrupsaun (CAC-siglá portugés), sei haruka karta ba liña ministériu no instituisaun autónomu-sira, hodi rekolla arrolamentu ba kargu xefia, ba prosesu deklarasaun riku-soin no bens interese.

“Semana oin, ita sei haruka karta notifikasaun arrolamentu ba ministéiru hotu-hotu, nune’e diresaun rekursu umanu ida-idak  rekolla dadus kargu xefia no funsionáriu ne’ebé responsabiliza iha área reseita, ho periúdu fulan ida atu aprezenta lista ba CAC,”Adjuntu Komisáriu CAC ba Asuntu Prevensaun no Sensivilizasaun, Luis Oliveira Sampaio, hateten ba jornalista Agéncia Tatoli, iha nia kna’ar fatin Praia dos Coqueiros, Dili, kinta ne’e.

Notísia relevante:Deklara riku-soin, CAC suspende arrolamentu ba kargu xefia

CAC sei anexa mós ho formuláriu manuál arrolamentu, hodi prienxe deklarante ho agregadu familiár, nune’e CAC rekolla no hatama dadus iha sistema.

CAC mós koordena hela ho Tribunál Rekursu (TR) no Ajénsia Teknolojia Informasaun no Komunikasaun (TIC-siglá portugés) Timor, Institutu Públiku, atu bele dezeña prosesu tékniku sistema formuláriu ba deklarasaun liu hosi meiu dijitál.

“Tuir lei, iha forma rua sistema ho dijitál no konvensionál. Tanba ne’e, ita prefere kria sistema eletróniku ne’ebé daudaun prosesu la’o hela no sistema ne’e sei asegura deklarante-sira,” Luis Oliveira Sampaio  subliña.

Prosesu arrolamentu dadus pesoál ne’ebé instituisaun ida-idak sei aprezenta relatóriu informasaun, nune’e CAC hahú efetua serbisu ba instituisaun hira mak arroladu, hodi sujeita halo deklarasaun.

Tanba ne’e, sei halo arrolamentu ba dadus pesoál hosi instituisaun hotu, hafoin define mapeamentu instituisaun hira mak aplika uluk, atu deklara riku-soin.

Entretantu, lei númeru 7/2020, 26 agostu kona-bá Medida Prevensaun no Kombate Korrupsaun (MPKK), iha 22 fevereiru tinan ne’e, tama ona iha vigór.

Lei MPKK, prevee iha kapítulu II Regime de Declaracão de Rendimentos, Bens e Interesses hosi artigu 27 to’o ba artigu 58.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here